پولیس افسران و جوان شہریوں سے حسن اخلاق اور مہذب طریقے سے پیش آئیں،انسپکٹر جنرل پولیس سلطان اعظم تیموری

بدھ 30 مئی 2018 20:32

اسلام آباد ۔ (اُردو پوائنٹ اخبارتازہ ترین - اے پی پی۔ 30 مئی2018ء) انسپکٹر جنرل پولیس اسلام آباد ڈاکٹر سلطان اعظم تیموری نے کہا ہے کہ پبلک سروس گاڑیوں میں سفر کرنے والے شہریوں کو ہر ممکن سفری سہولیات فراہم کریں، شہریوں سے حسن اخلاق اور مہذب طریقے سے پیش آئیں، ٹریفک قوانین کی خلاف ورزی کرنے والوں کے خلاف بلاامتیاز کارروائی اور وی آئی پی کلچر کا خاتمہ کیا جائے، روڈ سیفٹی اور ٹریفک قوانین کے متعلق آگاہی پروگرام کو مزید بہتر بنایا جائے تاکہ اسلام آباد کو حادثات سے پاک شہر بنایا جائے۔

ان خیالات کا اظہار انہوں نے پولیس لائن ہیڈ کوارٹرز میں آئی ٹی پی کے افسران و جوانوں کے دربار سے خطاب کرتے ہوئے کیاجس میں ایس ایس پی ٹریفک فرخ رشید، ایس پی ٹریفک چوہدری خالد رشید سمیت افسران و جوانوں کی بڑی تعداد نے شرکت کی۔

(جاری ہے)

آئی جی پی اسلام آباد نے افسران و جوانوں سے خطاب کے دوران کہا کہ آئی ٹی پی کے افسران و جوان پبلک سروس گاڑیوں میں سفر کرنے والے شہریوں کو ہر ممکن سفری سہولیات فراہم کریں اورشہریوں کی شکایات کا فوری ازالہ کیا جائے، آئی ٹی پی کے افسران و جوان دوران ڈیوٹی شہریوں کے ساتھ حسن اخلاق اورمہذب طریقے سے پیش آئیں،پہلے سلام پھر کلام اور پھر چالان کی پالیسی کو اپنائیں، ٹریفک قوانین کے خلاف ورزی کرنے والوں کے خلاف بلا امتیاز کاروائی کی جائے اور وی آئی پی کلچر کا مکمل خاتمہ کیا جائے ہمارا مشن یہ ہے کہ ہم نے روڈ کے اوپر ڈسپلن کو برقرار رکھنا ہے اوراس پلیٹ فارم سے اسلام آباد کی شاہراہوں کو حادثات سے پاک کرنا ہے ہم نے ٹریفک قوانین کی خلاف ورزی کرنے والوں کے خلاف زیرو ٹالرینس کی پالیسی پر کام کرنا ہے روڈ سیفٹی اورٹریفک قوانین کے متعلق آگاہی پروگرام کو مزید بہتر سے بہتر بنانا ہے ہم نے قانون پر عمل در آمد کروانے کے ساتھ ساتھ لوگوں کی خدمت کرنی ہے روڈ پر زیادہ سے زیادہ مدد کی فراہمی کو یقینی بنانا ہے ،اس موقع پر آئی جی پی اسلام آباد نے افسران و جوانوں کے ذاتی اور محکمانہ مسائل سنے اور ان کو حل کرنے کی یقین دہانی کرائی۔