پروڈکشن آرڈر1997ء میں رولزآف پروسیجر میں ترمیم کی منظوری

لاہور(اردوپوائنٹ اخبارتازہ ترین۔14 جنوری2019ء) وزیرقانون پنجاب محمد بشارت راجہ نے کہا ہے کہ پنجاب اسمبلی کے اجلاس میں بل منظوری کیلئے پیش کئے جا رہے ہیں اور ایوان نے پروڈکشن آرڈر کے حوالے سے رولز آف پروسیجر میں ترمیم کی منظوری دے دی ہے، ماضی میں 10 برس تک حکومت کرنے والوں کو پروڈکشن آرڈر کے حوالے سے ترمیم کرنے کا کوئی خیال نہیں آیا۔

تحریک انصاف کی حکومت کو اس ترمیم کا کریڈٹ جاتا ہے۔ تفصیلات کے مطابق وزیراعلیٰ پنجاب عثمان بزدارکی زیر صدارت آج90 شاہراہ قائداعظم پر تحریک انصاف اور اتحادی جماعتوں کے پارلیمانی پارٹیوں کا مشترکہ اجلاس منعقد ہوا۔ وزیراعلیٰ نے اجلاس سے خطاب کرتے ہوئے کہا کہ پنجاب اسمبلی میں مفاد عامہ کیلئے ریکارڈ قانون سازی کریں گے اورہم سب نے کپتان کی ٹیم بن کر صوبے کی بہتری اور عوام کی خوشحالی کیلئے کام کرنا ہے۔

(جاری ہے)

اراکین اسمبلی میرے ساتھی ہیں اور ہم صوبے کے عوام کی خدمت کے سفر میں ایک ہیں۔ پنجاب اسمبلی کے اجلاسوں کے دوران اراکین اسمبلی نے بھرپور حصہ لیا ہے اور ہر موقع پر پارٹی کو سرخرو کیا ہے۔انہوں نے کہا کہ میرے دروازے آپ کیلئے ہمہ وقت کھلے ہیں۔صوبے کی ترقی و خوشحالی کیلئے کام کر رہے ہیں اور کرتے رہیں گے۔ انہوں نے کہا کہ 100 روزہ ایجنڈے کے تحت مقررکردہ اہداف کے حصول کو یقینی بناناہے ۔

اب کام کرنے کا وقت آگیاہے۔30سال کی خرابیاں چند ماہ میں درست نہیں ہوسکتیں۔ سسٹم کو درست کرنے کیلئے اصلاحات کررہے ہیں۔ اجلاس میں صوبائی وزیر قانون محمد بشارت راجہ نے گفتگو کرتے ہوئے کہا کہ پنجاب اسمبلی کے اجلاس میں بل منظوری کیلئے پیش کئے جا رہے ہیں اور پروڈکشن آرڈر کے حوالے سے رولز آف پروسیجر میں ترمیم کی منظوری دے دی ہے۔ ماضی میں 10 برس تک حکومت کرنے والوں کو پروڈکشن آرڈر کے حوالے سے ترمیم کرنے کا کوئی خیال نہیں آیا۔

تحریک انصاف کی حکومت کو اس ترمیم کا کریڈٹ جاتا ہے۔انہوں نے کہا کہ بلاشبہ وزیراعلیٰ عثمان بزدار اور ان کی ٹیم یہ تاریخی ترمیم لا رہی ہے۔عثمان بزدار واحد وزیراعلیٰ ہیں جنہوں نے صوبے کے عوام اور پارٹی کے مفاد میں بے شمار اقدامات کئے ہیں۔ انہوں نے کہا کہ پرائیویٹ بل لانے پر بھی ممبرز کی حوصلہ افزائی کی جائے گی۔ انشاء اللہ مل کر صوبے کے عوام کی خدمت کریں گے۔ اجلاس میں سینئر وزیر عبدالعلیم خان، صوبائی وزیر قانون محمد بشارت راجہ،صوبائی وزراء اور اراکین اسمبلی نے شرکت کی۔