لوٹی ہوئی دولت کے خلاف گھیرا تنگ ہو رہا ہے‘

اسلام آباد (اُردو پوائنٹ اخبارتازہ ترین - اے پی پی۔ 24 اپریل2019ء) سابق وزیرخزانہ اور تحریک انصاف کے رکن قومی اسمبلی اسد عمر نے کہا ہے کہ لوٹی ہوئی دولت کے خلاف گھیرا تنگ ہو رہا ہے‘ جعلی اکائونٹس نکل رہے ہیں‘ ریڑھی اور فالودے والوں کے اکائونٹس سے پیسے نکل رہے ہوں تو پریشانی لازمی ہوگی‘ بلاول بھٹو کو غدار نہیں سمجھتا‘ پیپلز پارٹی کی حکومت نے چار وزراء خزانہ تبدیل کئے‘ اگر ہم ناکام ہیں تو وہ ناکام ترین اور نااہل ترین ہیں۔

بدھ کو قومی اسمبلی میں ذاتی وضاحت پر اسد عمر نے کہا کہ دو روز قبل بلاول بھٹو زرداری نے اپنی تقریر میں چند اہم نکات پر بات کی ہے‘ میں ضروری سمجھتا ہوں کہ ان کی طرف سے اٹھائے گئے بعض نکات کا جواب دے دوں۔ اسد عمر نے کہا کہ انہیں بلاول بھٹو زرداری کے انگریزی بولنے پر کوئی اعتراض نہیں ہے اور نہ ہی وہ انہیں غدار سمجھتے ہیں، میں نے صرف یہ بات کہی تھی کہ ان کے انگریزی میں کہے ہوئے الفاظ پاکستان کے خلاف استعمال ہوسکتے ہیں اور اس کے اگلے ہی دن ایک بھارتی اخبار نے ان کی تقریر کا حوالہ دیا۔

(جاری ہے)

اسد عمر نے کہا کہ بلاول نے پاکستان کے معاشی قتل کی بات کی ہے‘ پاکستان کی معیشت کی ترقی کی رفتار سست ہے‘ آنے والے دو تین برسوں میں معاشی ترقی کی رفتار سست رہے گی، ہمیں جس رفتار سے آگے جانے کی ضرورت ہے وہ ترقی نہیںہورہی، جب ادائیگیوں میں توازن کا بحران ہو تو ایسا ہی ہوتا ہے لیکن اگر پیپلز پارٹی کے پانچ سالوں سے موازنہ کیا جائے تو صورتحال واضح ہو جاتی ہے۔

پیپلز پارٹی حکومت کے پہلے سال میں ملکی ترقی کی شرح 0.4 فیصد تھی جبکہ پانچ سال میں اوسط ترقی کی شرح 2.8 فیصد رہی، یہ پاکستان کی تاریخ کی واحد حکومت تھی جس میں ترقی کی کم شرح رہی ہے۔ اسد عمر نے کہا کہ بلاول بھٹو زرداری نے مہنگائی کے حوالے سے بھی بات کی، مہنگائی پاکستان کا مسئلہ ہے، میں اعتراف کرتا ہوں کہ اس میں اضافہ ہوا ہے۔ موجودہ حکومت کے آٹھ ماہ میں افراط زر کی اوسط شرح 6.8 فیصد رہی، پیپلز پارٹی کے پانچ سالوں میں افراط زر کی اوسط شرح 12.3 فیصد تھی۔

اس وقت مہنگائی کے خلاف انہوں نے کوئی آواز نہیں اٹھائی۔ انہوں نے کہا کہ بجٹ خسارے کی بھی بات کی گئی ہے اس میں کوئی شک نہیں کہ بجٹ خسارہ ایک اہم مسئلہ ہے۔ پیپلز پارٹی دور میں بجٹ خسارہ 7.8 فیصد تھا۔ بلاول نے ٹیکس و ریونیو اہداف کا نکتہ بھی اٹھایا ہے۔ انہوں نے درست کہا ہے رواں سال بھی اہداف میں 7 سے 8 فیصد کمی ہو سکتی ہے لیکن یہ اہداف موجودہ حکومت نے مقرر نہیں کئے ہیں۔

انہوں نے کہا کہ پیپلز پارٹی کے پانچ سالوں میں ٹیکس و ریونیو کے اہداف میں سالانہ آٹھ فیصد کے حساب سے کمی ریکارڈ کی گئی تھی۔ بلاول بھٹو زرداری کو پاکستان پر قرضوں کی بڑی فکر ہے، قرضے بڑھ رہے ہیں جو بڑھنے نہیں چاہئیں تھے لیکن پیپلز پارٹی کے دور حکومت میں قومی قرضوں میں 135 فیصد اضافہ ریکارڈ کیا گیا جو بلند ترین ہے۔ انہوں نے کہا کہ وزیرخزانہ تبدیل ہونے کو بلاول بھٹو نے حکومت کی ناکامی قرار دیا ہے۔

ان کی حکومت نے چار سورما تبدیل کئے، اگر ہم نااہل ہیں تو وہ تو نااہل اور ناکام ترین ہیں۔ انہوں نے کہا کہ بلاول یہ باتیں اس لئے کر رہے ہیں کیونکہ لوٹی ہوئی دولت کے خلاف گھیرا تنگ ہو رہا ہے۔ جعلی اکائونٹس نکل رہے ہیں، ریڑھی اور فالودے والوں کے اکائونٹس سے پیسے نکل رہے ہیں، انہیں پریشانی تو ہوگی اور انہیں اس پریشانی کا حق ہے۔ جب سوئس اکائونٹ ‘ پارک لین خطرے میں ہوں تو اس طرح کی آوازیں تو بلند ہوں گی۔

اسد عمر نے کہا کہ اس وقت ملک میں ایسی حکومت قائم ہے جو اقتصادی مافیاز کے خلاف کھڑی ہے، جب ان پر دروازے بند ہوں گے تو طاقتوروں کے ملاپ سے شور سنائی دے گا لیکن احتساب کا عمل آگے بڑھے گا، اگر عوام کی نمائندگی کرنی ہے تو ہمیں مافیا کی سازشیں برداشت کرنا اور ان کا مقابلہ کرنا پڑے گا۔ پاکستان 21 کروڑ عوام کا ملک ہے اور ہم گھٹنے نہیں ٹیکیں گے‘ عوام کے سامنے سچ بولیں گے۔ مشکل فیصلے کئے ہیں آگے بھی کریں گے، اگر عوام کو نظر آیا کہ بہتری کا سفر شروع ہے اور پاکستان بہتری کی طرف جائے گا تو وہ مشکلات برداشت کریں گے۔ انہوں نے کہا کہ پاکستان زندہ باد ہر پاکستانی کی آواز ہے۔