Live Updates

پورا آزاد کشمیر میرا حلقہ ہے ، میرپور کی ترقی مظفرآباد سے زیادہ عزیز ہے، محمد فاروق حیدر

منگلاڈیم کیلئے لوگوں نے اپنا گھر بار چھوڑااور بیرون ممالک سے زرمبادلہ بھیج رہے ہیں ، اگر گزشتہ ادوار میں ماسٹر پلان پر عمل ہوتا تو آج میرپور ماڈل سٹی بنا ہوتا،ہمارا منشور کرسی نہیںعوام کی خدمت ہے، وزیراعظم آزاد کشمیرکی صحافیوں سے گفتگو

بدھ 26 جون 2019 18:44

مظفر آباد (اُردو پوائنٹ اخبارتازہ ترین - این این آئی۔ 26 جون2019ء) وزیر اعظم آزادحکومت ریاست جموں وکشمیر راجہ محمد فاروق حیدرخان نے کہا ہے کہ پورا آزاد کشمیر میرا حلقہ ہے ، میرپور کی ترقی مظفرآباد سے زیادہ عزیز ہے۔میرپور کے لوگوں کی قربانیوں کااحساس ہے ۔ منگلاڈیم کے لیے لوگوں نے اپنا گھر بار چھوڑااور بیرون ممالک سے زرمبادلہ بھیج رہے ہیں ۔

اگر گزشتہ ادوار میں ماسٹر پلان پر عمل ہوتا تو آج میرپور ماڈل سٹی بنا ہوتا۔ہماری حکومت نے میرپور میں پلاٹو ں کی بند ر بانٹ بند کروائی ۔ میرپور میں صنعتی زون کے قیام سے معاشی انقلاب آئے گا۔ میرپورکوبین الاقوامی نوعیت اور ٹورازم کے حوالے سے جدیدشہر بنانے کے لیے ہرممکن اقدامات اٹھارہے ہیں۔ہمارا منشور کرسی نہیں بلکہ عوام کی خدمت ہے ۔

(جاری ہے)

اقتدار میں آنے کے بعد کرپشن کے خاتمہ کیلئے اقدامات اٹھائے ۔ گزشتہ تین سالوں میںبھمبر سے لیکر تائو بٹ تک آزادکشمیر کے ہرشہراور گائوں میں تعمیر وترقی ہوئی جو زمین پر نظر آرہی ہے ۔ میرپور شہر کے مسائل کے حل کیلئے خصوصی اقدامات اٹھائے گئے ۔وزیر اعظم بدھ کے روزمیرپور کے صحافیوں سے بات چیت کر رہے تھے جنہوں نے ایوان وزیراعظم میں ان سے ملاقات کی وزیراعظم سے ملنے والوں میں ظہیر اعظم جرال،رمضان چغتائی اور خالدحسین شامل تھے۔

وزیر اعظم نے کہاکہ ہماری حکومت کی بہترحکمت عملی سے آزادکشمیر کا ترقیاتی بجٹ دوگنا ہوا جس سے ریاست میں تعمیر وترقی کا انقلاب آیا۔ جب حکومت ملی تو بجٹ خسارے میں تھا ہماری حکومت نے گڈگورننس کا نفاذ عمل میں لایا اور بہترین حکمت عملی کے تحت عوام کی خدمت کی ۔انہوں نے کہاکہ آئندہ مالی سال کیلئے متوازن بجٹ پیش کیا گیا ہے جس میں عوامی ترقی و خوشحالی اور صحت،تعلیم اور سیاحت پر خصوصی فوکس کیا گیا ہے ۔

انہوںنے کہاکہ ہم نے اقتدار میں آکر میرپور میں پلاٹوں کی الاٹمنٹ بند کی جو کرپشن کا گڑھ بن چکا تھا۔ انہوںنے کہاکہ ہماری حکومت کے اقدامات کی وجہ سے اوورسیز یہاں سرمایہ کاری کرنے کی طرف بھی راغب ہورہے ہیں۔انہوں نے کہا کہ میرپور سمیت آزادکشمیر کے تمام شہروں کی صفائی ستھرائی کیلئے خصوصی نظام لارہے ہیں ۔