مولانا کا آزادی مارچ ذاتی مفادات و خواہشات کی تکمیل کا مارچ ہے، ڈپٹی سپیکر پنجاب اسمبلی

منگل 22 اکتوبر 2019 17:18

لاہور۔22 اکتوبر(اُردو پوائنٹ اخبارتازہ ترین - اے پی پی۔ 22 اکتوبر2019ء) ڈپٹی سپیکر پنجاب اسمبلی سردار دوست محمد مزاری نے کہا کہ مولانا کا آزادی مارچ دراصل ذاتی مفادات اور خواہشات کی تکمیل کا مارچ ہے اس کا نام آزادی مارچ نہیں بلکہ مفاداتی مارچ ہونا چاہیے۔ان خیالات کا اظہار انہوں نے اپنے آبائی ضلع راجن پور میں بڑے عوامی اجتماع سے خطاب کے دوران کیا۔

انہوں نے کہا کہ مولانا فضل الرحمٰن اور دوسری اپوزیشن جماعتیں انتشار کی سیاست سے باز رہیں، حکومت سے مذاکرات کریں اور جمہوری روایات کے مطابق مسائل کے حل کے لیے بات چیت کا راستہ اپنائیں اور ملکی مفاد پر ذاتی مفاد کو ترجیح نہ دیں۔

(جاری ہے)

ڈپٹی سپیکر نے کہا کہ یہ وقت قوم کو تقسیم کرنے کا نہیں بلکہ یکجہتی و اتحاد کو فروغ دینے کا ہے تاکہ مظلوم کشمیری عوام کے حق میں اٹھائی جانے والی آواز میں تمام پاکستانیوں کی آواز شامل ہو، حکومت احتجاج یا کسی مارچ سے خوفزدہ نہیں اور نہ ہی اپوزیشن کا یہ حق چھیننا چاہتی ہے لیکن اگر احتجاج کی آڑ میں انتشار پیدا کرنے کی کوشش کی گئی اور اس سے امن کا خطرہ پیدا ہوا تو قانون حرکت میں آئے گا اور حالات کو سازگار رکھنے کے لیے حکومت قانون اور آئین کے دائرہ میں رہتے ہوئے ہر راستہ اپنائے گی اس لیے اپوزیشن کو چاہیے کہ سمجھ داری کا مظاہرہ کرتے ہوئے حکومت کے ساتھ بھارتی جارحیت کا منہ توڑ جواب دینے کے لیے کندھے سے کندھا ملا کر کھڑے ہوں۔