1947میں بھارت چلے جانے والا 90سالہ ہربنس سنگھ اپنے بچپن کے دوست محمد شریف سے ملنے کیلئے بیتاب

ہربنس سنگھ نے بتایا کہ انکا ایک دوست گوجرانوالا میں رہتا ہے اور اس کا نام محمد شریف تھا جو انکے بڑے بھائی کا بھی گہرا دوست تھا اور وہ اس سے ملنا چاہتے ہیں۔ وہ نہیں جانتے کہ وہ محمد شریف سے مل سکیں گے یا نہیں لیکن ان کی شدید خواہش ہے کہ وہ محمد شریف کو مل سکیں۔

(جاری ہے)

انہوں نے کہا کہ وہ مجبوری میں بھارت گئے لیکن وہ کبھی بھی اس مٹی کو نہیں بھول سکے۔ انہوں نے پاکستانیوں کو مخاطب کر کے کہا کہ تم سب میرے بھائی اور بھتیجے ہو۔ واضح رہے کہ پاکستان کی جانب سے کرتار پور راہداری کا افتتاح کرکے امن کی جانب تاریخی قدم بڑھایا گیا جسے دنیا بھر میں سراہا جارہا ہے۔ انٹرنیشنل میڈیا اور اقوام عالم کے کئی اہم ممالک نے اس کاوش کی زبردست تعریف کی ہے۔

میڈیارپورٹس کے مطابق بھارت کی جانب سے کرتاپور صاحب کے درشن کے لیے 500 یاتریوں کا پہلا جتھہ بھارتی وزیراعلی پنجاب امریندر سنگھ کی سربراہی میں آیا۔ جن میں کئی نامور شخصیات بھی موجود تھیں۔ سابق بھارتی وزیراعظم منموہن سنگھ، بھارتی اداکار و ممبر پارلیمنٹ سنی دیول بھی پاکستان آنے والوں میں شامل تھے۔سکھ کمیونٹی کے لیے تاریخی دن کی تقریب میں شرکت کرنے کے بعد سابق بھارتی وزیراعظم منموہن سنگھ بھارت روانہ ہوئے۔ بھارتی میڈیا سے گفتگو کرتے ہوئے ان کا کہنا تھا کہ یہ اچھی شروعات ہے، بھارت اور پاکستان کے مابین تعلقات میں اگرچہ اتار چڑھائو ہے مگر میں امید کرتا ہوں کہ یہ حالات نارمل کرنے کے لیے بہت اچھی شروعات ہے۔