ہمسایوں کی آتش بازی سے ڈر کر 246 مرغیاں مر گئی۔ کسان کا الزام

امین اکبر جمعرات 2 جنوری 2020 23:48

ایک کسان نے اپنی 246 مرغیوں کے مرنے کا الزام اپنے ہمسایوں پر عائد کیا ہے۔ کسان کا کہنا ہے کہ مرغیاں ہمسایوں کی آتش بازی کے شور کی وجہ سے مری ہیں۔
چین کے صوبے سیچوان کے ییبن شہر کے مضافات میں رہنے والے ایک شخص، شیاؤراؤ، نے اپنے والد کی 50 ویں سالگرہ پر آتش بازی کے 10 باکس استعمال کیے۔

(جاری ہے)

یہ آتش بازی جہاں دوسرے ہمسایوں کے لیے اذیت کا سبب بن رہی تھی، وہاں اس نے ایک ہمسائے کےمرغی خانے میں بھی تباہی پھیلا دی۔

مرغی خانے کے مالک کسان کا کہنا ہے کہ آتش بازی کی آوازوں سے ڈر کر اُن کی 246 مرغیاں مر گئیں۔
کسان نے مرغیاں مرنے پر شیاؤراؤ سے 15 ہزار یوان یا 2100 ڈالر ہرجانے کا مطالبہ کیا ہے لیکن شیاؤ راؤ نے اپنے ہمسائے کو ایک یوان بھی ادا کرنے سے انکار کر دیا ہے حالانکہ آتش بازی والی رات شیاؤ راؤ کی اپنی بہت سی مرغیاں بھی مر گئی تھیں۔