وفاقی کابینہ نے اقتصادی رابطہ کمیٹی کے فیصلوں کی توثیق کردی

کابینہ نے قانون سازی سے متعلق کمیٹی کے فیصلوں کی بھی توثیق کی

Mian Nadeem میاں محمد ندیم منگل جنوری 19:38

وفاقی کابینہ نے اقتصادی رابطہ کمیٹی کے فیصلوں کی توثیق کردی
اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔14 جنوری۔2020ء) وفاقی کابینہ نے اقتصادی رابطہ کمیٹی کے اجلاس کے فیصلوں اور قانون سازی سے متعلق کمیٹی کے فیصلوں کی توثیق کردی ذرائع کے مطابق وزیراعظم عمران خان کی زیر صدارت وفاقی کابینہ کا اجلاس ہوا، جس میں کابینہ کی قانون سازی سے متعلق کمیٹی کے فیصلوں کی توثیق کی گئی.ذرائع کے مطابق کابینہ نے پاکستان اور سعودی عرب کے درمیان ایئر سروسز کے معاہدے کی منطوری دی اجلاس میں فلیگ آفیسر کی ڈیپوٹیشن پر بطور ڈی جی پاکستان میری ٹائم سیکیورٹی ایجنسی تقرری کی منظوری بھی دے دی گئی ذرائع کے مطابق اجلاس میں ہیوی انڈسٹریز ٹیکسلا بورڈ میں پروڈکشن کنٹرول کے ممبر کی تقرری کی منظوری دی گئی.

(جاری ہے)

کابینہ اجلاس میں فاٹا اور گلگت بلتستان کے 4 فیصد کوٹہ کی تقسیم پر رپورٹ کابینہ میں پیش کردی گئی کابینہ نے پاکستان محتسب کراچی سیکرٹریٹ میں انچارج ممبر کی تقرری کی منظوری دی تاہم پاکستان اسٹیٹ آئل (پی ایس او) کے ایم ڈی، سی ای او کی تقرری کی منظوری موخر کردی.

اجلاس میں کابینہ نے لاہور، کراچی، پشاور اور ملتان میں کثیرالمنزلہ عمارتوں کی تعمیر کی منظوری دی جبکہ پاکستان اسٹیٹ آئل کمپنی کے ایم ڈی کی تعیناتی کی سمری موخر کردی اجلاس میں وزیر اعظم عمران خان نے قومی سلامتی کمیٹی کی تشکیل نو کر دی ذرائع کے مطابق قومی سلامتی کمیٹی اب 12 ارکان پر مشتمل ہو گی، جس کے چیئرمین وزیر اعظم عمران خان ہوں گے.ذرائع نے بتایا ہے کہ وزیرِ دفاع پرویز خٹک، وزیرِ داخلہ اعجاز شاہ اور وزیرِ خارجہ شاہ محمود قریشی کمیٹی میں شامل ہیں ذرائع کا مزید کہنا ہے کہ مشیرخزانہ عبدالحفیظ شیخ، معاونِ خصوصی برائے اطلاعات و نشریات ڈاکٹر فردوس عاشق اعوان اور معاونِ خصوصی نیشنل سیکیورٹی ڈویژن کمیٹی ڈاکٹر معید یوسف بھی کمیٹی میں شامل ہیں.ذرائع کے مطابق چیئرمین جوائنٹ چیفس آف اسٹاف کمیٹی اور تینوں مسلح افواج کے سربراہ بھی قومی سلامتی کمیٹی کا حصہ ہوں گے، ان کے علاوہ سیکرٹری کابینہ ڈویژن بھی اس کمیٹی کے رکن ہوں گے اجلا س میں وزیراعظم عمران خان نے بے نظیر انکم سپورٹ پروگرام سے فائدہ اٹھانے والے سرکاری افسران کے نام عوام کے سامنے ظاہر کرنے کا حکم د یتے ہوئے کہا کہ بے نظیر انکم اسپورٹ پروگرام میں فراڈ کرنے والے سرکاری افسران کے ناموں کی تشہیر کی جائے قبل ازیں پروگرام سے نکالے گئے سرکاری افسران کی رپورٹ وزیراعظم کو پیش کی گئی تو عمران خان نے معاملے پر شدید اظہار برہمی کرتے ہوئے ملوث سرکاری افسران کے نام پبلک کرنے کی ہدایت دے دی وزیراعظم نے کہا کہ غریبوں کا حق لوٹنے والوں کو چھوٹ نہیں دے سکتے، لوٹ مار کرنے والوں کے نام قوم کے سامنے لائے جائیں.

وفاقی کابینہ نے وزارت صحت کی تنظیم نو کی منظوری بھی دی، وزارت نیشنل ہیلتھ سروسز ریگو لییشن اینڈ کوآرڈینیشن کا نام تبدیل کرنے کا فیصلہ کرلیا گیا.شعبہ صحت میں اصلاحات کا سلسلہ جاری ہے، اس حوالے سے وزیرمملکت برائے امور قومی صحت ڈاکٹر ظفر مرزا نے بتایا کہ وفاقی کابینہ نے وزارت صحت کی تنظیم نو کی منظوری دے دی ہے. اس حوالے سے وزارت نیشنل ہیلتھ سروسز ریگولییشن اینڈ کوآرڈینیشن کا نام تبدیل کرنے کا فیصلہ کیا گیا ہے، اب اس وزارت کا نام منسٹری آف ہیلتھ اینڈ پاپولیشن ہوگا ظفر مرزا کا کہنا ہے کہ مذکورہ وزارت میں ٹیکنیکل اور انتظامی عہدوں میں عدم توازن تھا،80فیصد انتظامی جبکہ 20 فیصد تیکنیکی نوعیت کے عہدے تھے اور 80فیصد افسران اور اسٹاف کا تحقیقی پس منظر بھی نہ تھا.وزیر مملکت کا مزید کہنا ہے کہ منظور تجویز میں تکنیکی عملہ70 جبکہ دیگر 30 فیصد ہیں، وزارت میں تربیت یافتہ اورمطلوبہ قابلیت کے ماہرین کی کمی تھی، اس کے علاوہ وفاقی کابینہ کے اجلاس میں قومی ہیلتھ سروس گروپ کے قیام کی منظوری بھی دی گئی ہے.اجلاس کے دوران وفاقی کابینہ نے چوہدری شوگر ملز کیس میں مسلم لیگ (ن) کی نائب صدر مریم نواز کا نام ایگزٹ کنٹرول لسٹ (ای سی ایل) میں ڈالنے کی منظوری بھی دی‘ذرائع کے مطابق اجلاس کے دوران وزیراعظم نے مشرق وسطیٰ کی صورتحال پر پاکستانی موقف پر کابینہ ارکان کو اعتماد میں لیا کابینہ کی ذیلی کمیٹی برائے ای سی ایل نے چوہدری شوگر ملز کیس میں مریم نواز کا نام ای سی ایل میں شامل کرنے کی سفارش کی تھی جس کی کابینہ نے منظوری دے دی ہے.

واضح رہے کہ ایون فیلڈ ریفرنس میں سزا معطلی کے بعد مریم نواز نے چوہدری شوگر ملز کیس میں ای سی ایل سے نام نکلوانے کے لیے لاہور ہائیکورٹ سے رجوع کر رکھا ہے لاہور ہائیکورٹ مریم نواز کا پاسپورٹ واپس کرنے اور نام ای سی ایل سے نکالنے کی درخواست 15 جنوری کو سماعت کے لیے مقرر بھی کرچکی ہے.