میرشکیل الرحمان کی گرفتاری کے خلاف پنجاب اسمبلی میں قرارداد جمع کرادی گئی

جمعہ 13 مارچ 2020 21:10

لاہور(اُردو پوائنٹ اخبارتازہ ترین - این این آئی۔ 13 مارچ2020ء) میر شکیل الرحمان کی گرفتاری کے خلاف پنجاب اسمبلی میں قرارداد جمع کرادی گئی۔قرارداد مسلم لیگ (ن) کی رکن سعدیہ تیمور نے جمع کرائی جس کے متن میں کہا گیاکہ ایوان میر شکیل الرحمان کی گرفتاری کی شدید مذمت کرتا ہے، ان کی گرفتاری صحافت کی آزادی سلب کرنے کے مترادف ہے۔

(جاری ہے)

قرارداد میں کہا گیا کہ جنگ اور جیو نے ہمیشہ حقائق پر مبنی صحافت کی ہے، جنگ ،جیو نے جمہوریت کے تحفظ اور آمریت کے خلاف ہمیشہ قابل ذکر کردار ادا کیا، میر شکیل الرحمان کی نجی نوعیت کے معاملے میں گرفتاری ناقابل فہم ہے۔

متن کے مطابق میر شکیل الرحمان آزادی صحافت کے علمبر دار ہیں اور ایوان ان کی گرفتاری کو نیب کا ایک اور متنازع فیصلہ قراردیتا ہے، وہ ملک کے سب سے بڑے صحافتی ادارے کے مالک ہیں، جنگ گروپ کبھی حکومتی دبائو کو خاطر میں نہیں لایا۔