اندرون آزادکشمیر اورباہر سے آنے والی اشیاء خوردو نوش کی کسی بھی گاڑی کو نہ روکا جائے، راجہ فاروق حیدر

جمعہ 27 مارچ 2020 23:02

مظفرآباد ۔ (اُردو پوائنٹ اخبارتازہ ترین - اے پی پی۔ 27 مارچ2020ء) وزیر اعظم آزادجموں وکشمیر راجہ محمد فاروق حیدر نے کہا کہ اندرون آزادکشمیر اورباہر سے آنے والی اشیاء خوردو نوش کی کسی بھی گاڑی کو نہ روکا جائے۔ کرونا وائرس کیخلاف فرنٹ لائن پر اپنی زندگیاں داؤ پر لگا کر انسانیت کے لیے کام کرنے والے ڈاکٹر ز کوسلام پیش کرتا ہوں۔ گلگت میں مریضوں کی دیکھ بحال کرتے ہوئے اپنی جان قربان کرنے والے ڈاکٹر اسامہ کے لیے آزادکشمیر کے سب سے بڑے سرکاری اعزاز کا اعلان کرتا ہوں۔

وزیر اعظم آزادکشمیر نے کہا کہ آزادکشمیر بھر کے محکمہ صحت کے ڈاکٹر ز اور پیرا میڈیکل سٹاف گریڈ 1سے لے کر 20 تک کیلئے بنیادی تنخواہ کے مساوی بونس کا اعلان کرتے ہوئے کہا کہ حکومت ان کی حفاظت یقینی بنائے گی اور ان کو حفاظتی ساز و سامان ہر صورت مہیا کیا جائے گا۔

(جاری ہے)

وزیر اعظم آزادکشمیر نے کہا کہ تمام کمشنر ز صاحبان اپنے اپنے ڈویژن میں اشیاء خورد ونوش کی قیمتوں پر کڑی نظر رکھیں اور باہر سے آنے والے سامان کی ترسیل یقینی بنانے کے لیے متعلقہ کمشنر ز سے رابطہ میں رہیں۔

وزیر اعظم آزادکشمیر نے کہا کہ مظفرآباد میں کرونا ٹیسٹنگ لیب فنکشل ہو چکی ہے۔میرپور لیبارٹری کو اپ گریڈ کیا جا رہا ہے۔ راولاکوٹ میں کرونا ٹیسٹنگ لیب بنانے کے لیے این ڈی ایم اے کو تحریک کردی گئی ہے۔ وزیر اعظم آزادکشمیر وزیر اعظم سیکرٹریٹ میں اعلی سطحی اجلاس سے خطاب کر رہے تھے، جس میں چیف سیکرٹری آزادکشمیر مطہرنیاز رانا، سیکرٹری صحت میجر جنرل طاہر سردار سمیت اعلیٰ حکام موجود تھے ۔