فیصل آباد سمیت صوبہ بھر کے تعلیمی بورڈز نے کلاس نہم کے سالانہ امتحانات کے بقیہ پیپرز سمیت دیگر امتحانات کے انعقاد کا تاحال کوئی فیصلہ نہیں کیا ،کورونا کے حوالے سے پیدا شدہ صورتحال بہتر ہونے پر ایجوکیشن بورڈز کمیٹی فیصلے کا اعلان کرے گی ، شہری سوشل میڈیا پر پھیلائی جانے والی اطلاعات پر یقین نہ کریں ، کنٹرولر امتحانات فیصل آبادبورڈ

فیصل آباد (اُردو پوائنٹ اخبارتازہ ترین - اے پی پی۔ 06 مئی2020ء) بورڈ آف انٹرمیڈیٹ اینڈ سیکنڈری ایجوکیشن فیصل آباد کی کنٹرولر امتحانات پروفیسر مسز شہناز علوی نے بتایاہے کہ فیصل آباد سمیت صوبہ بھر کے تعلیمی بورڈز نے کلاس نہم کے سالانہ امتحانات کے بقیہ پیپرز سمیت دیگر امتحانات کے انعقاد کا تاحال کوئی فیصلہ نہیں کیاجبکہ کورونا کے حوالے سے پیدا شدہ صورتحال بہتر ہونے پر ایجوکیشن بورڈز کمیٹی فیصلے کا اعلان کرے گی لہٰذا شہری سوشل میڈیا پر پھیلائی جانے والی اطلاعات پر یقین نہ کریں ۔

بدھ کے روز اے پی پی سے بات چیت کے دوران انہوں نے بتایاکہ کورونا لاک ڈاؤن کی وجہ سے حکومتی احکامات کی روشنی میں بورڈ آف انٹرمیڈیٹ اینڈ سیکنڈری ایجوکیشن فیصل آباد ، ملتان، بہاولپور،ڈیرہ غازی خان، سرگودھا، ساہیوال، راولپنڈی، گوجرانوالہ، لاہور نے متفقہ طورپر تمام امتحانات ملتوی کرنے کا اعلان کیاتھا۔

(جاری ہے)

انہوں نے بتایاکہ اب سوشل میڈیا پر بعض جعلی نوٹیفکیشن شیئر کئے جارہے ہیں اور امتحانات کے شیڈول کے بارے میں بھی افواہوں پر مبنی اطلاعات چلائی جارہی ہیں جن کا حقیقت سے کوئی تعلق نہیں ۔

انہوں نے بتایاکہ جونہی صورتحال بہتر ہوگی پنجاب ایجوکیشن بور ڈز کمیٹی آف چیئرمین کے متفقہ فیصلہ کا اعلان کیاجائے گا اور سرکاری میڈیا کے ذریعے شہریوں کو مکمل آگاہی بھی فراہم کی جائے گی۔