سیکرٹری صحت عامہ آزاد کشمیر کی زیر صدارت جملہ کرونا لیبارٹریز ٹیسٹس و حفاظتی کٹس لاجسٹکس کے حوالے سے اجلاس

میرپور مظفرآباد اور راولاکوٹ میں لیبز کام کررہی ہیں ،روزانہ کی بنیاد پر ٹیسٹ لیے جارہے ہیں،محکمہ صحت کا عملہ آزاد کشمیر کے تمام انٹری پوائنٹس پر موجود ،باہر سے آنے والے مسافروں کی سکریننگ کررہا ہے ،بریفنگ

اتوار 10 مئی 2020 16:50

مظفرآباد (اُردو پوائنٹ اخبارتازہ ترین - این این آئی۔ 10 مئی2020ء) سیکرٹری صحت عامہ آزاد کشمیر میجر جنرل طاہر سردار کی زیر صدارت ای پی آئی آزاد کشمیر کے مرکزی دفتر میں کرونا COVID-19 کے حوالے سے جملہ کرونا لیبارٹریز ٹیسٹس و حفاظتی کٹس لاجسٹکس کے حوالے سے اجلاس منعقد ہوا۔اجلاس میں ڈائریکٹر جنرل ہیلتھ آزاد کشمیر ڈاکٹر سردار آفتاب حسین اور پروونشیل پروگرام منیجر ای پی آئی آزاد کشمیر و فوکل پرسن کویڈ 19 کنٹرول روم مظفرآباد میڈم ڈاکٹر بشریٰ شمس اور تمام ڈسٹرکٹ ہیلتھ افسران اور دیگر نے شرکت کی۔

اجلاس پرونشل پروگرام منیجر ای پی آئی آزاد کشمیر ڈاکٹر بشری شمس نے پی سی آر ٹیسٹس اور حفاظتی کٹس اور کرونا ایمرجنسی کے حوالے سے بریفنگ دی۔ ڈاکٹر بشری شمس نے کہا کہ میرپور مظفرآباد اور راولاکوٹ میں لیبز کام کررہی ہیں اور روزانہ کی بنیاد پر ٹیسٹ لیے جارہے ہیں۔

(جاری ہے)

اس کے علاوہ محکمہ صحت کا عملہ آزاد کشمیر کے تمام انٹری پوائنٹس پر موجود ہے جو انتظامیہ کے تعاون سے باہر سے آنے والے مسافروں کی سکریننگ کررہا ہے اور شبہ ہونے کی صورت میں مشتبہ افراد کو قریبی قرنطینہ مراکز شفٹ کر دیا جاتا ہے جہاں سے مسافروں کے ٹیسٹ لیکر منفی آنے کی صورت میں انہیں ڈسچارج کیا جاتا ہے۔

اجلاس کو بتایا گیا کہ ایمز میں ایک اور کرونا ٹیسٹنگ لیے قائم کی جارہی ہے جس کا سامان آچکا ہے اور جلد ہی کام شروع کر دے گی۔