فلسطین کی آزادی کے لیے لڑنا اسلامی فریضہ ہے، ایرانی سپرم لیڈر آیت اللہ خامنہی

ہفتہ 23 مئی 2020 00:02

تہران۔ (اُردو پوائنٹ اخبارتازہ ترین - اے پی پی۔ 22 مئی2020ء) ایران میں ماہ رمضان کے الوداعی جمعے کو فلسطینیوں کے ساتھ اظہار یکجہتی میں یوم القدس منایا جاتا ہے۔ ذرائع ابلاغ کے مطابق سپرم لیڈر آیت اللہ علی خامنہی نے اسرائیل پر سخت تنقید کرتے ہوئے فلسطین کی آزادی کی جد و جہد کو مذہبی فریضہ قرار دیا۔ ایرانی سپریم لیڈر آیت اللہ علی خامنہی نے جمعتہ الوداع کے روز ایرانی ٹی وی چینل پر براہ راست تقریر میں کہا کہ فلسطین کی آزادی کے لیے لڑنا اسلامی فریضہ ہے، انہوں نے مزید کہا کہ فلسطین کے لیے جاری جدوجہد کا مقصد مکمل فلسطینی سرزمین کی آزادی اور فلسطینیوں کی اپنی آبائی زمین پر واپسی ہے۔

ایران میں ہر رمضان کے آخری جمعہ کو یوم القدس منایا جاتا ہے۔ یہ دن 1967ء کی جنگ کی یاد میں بھی منایا جاتا ہے، جس کے نتیجے میں اسرائیل نے مشرقی یروشلم پر قبضہ کر لیا تھا۔

(جاری ہے)

اس کا مقصد اسرائیل کی مخالفت اور فلسطینیوں کے ساتھ اظہار یکجہتی ہے۔ ایران میں یہ دن ہر سال ملک گیر سطح پر منایا جاتا ہے اور اس موقع پر تمام شہروں میں ریلیاں نکالی جاتی ہیں۔

اس بار کورونا وائرس کی عالمی وبا کے تناظر میں عوامی سطح پر جلسے جلوسوں پر پابندی عائد ہے تاہم پچھلے ہفتے صدر حسن روحانی نے اپنے بیان میں کہا تھا کہ احتجاج گاڑیوں کی مدد سے ریلی کی شکل میں کیا جائے گا۔ یہ پہلا موقع ہے کہ یوم القدس کے موقع پر ایرانی سپریم لیڈر آیت اللہ علی خامنہ ای نے باقاعدہ تقریر کی ہے۔ اپنی تقریر میں انہوں نے اسرائیل کے لیے کافی سخت الفاظ استعمال کرتے ہوئے اسے خطے میں سرطان سے تشبیہ دی۔

خامنہی اور دیگر ایرانی رہنماء کئی مرتبہ یہودی ریاست اسرائیل کے خاتمے کی دھمکیاں بھی دے چکے ہیں۔ ماضی میں انہوں نے اس بارے میں خطے میں ریفرنڈم کا مطالبہ بھی کر چکے ہیں۔ ایران میں یوم القدس منانے کی روایت 1979ء میں آیت اللہ روح اللہ خمینی نے شروع کی تھی۔ ایران اسرائیل کو بطور ریاست تسلیم نہیں کرتا اور بیشتر عالمی مسائل کا قصور وار اسرائیل ہی کو قرار دیتا ہے۔