وفاقی دارالحکومت میں ماسک پہننا لازمی قرار دیدیا گیا

عوامی جگہوں پر چیکنگ کی جائے گی، ماسک نہ پہننے والوں کو 3ہزار تک جرمانہ ہوگا، جیل بھی بھیجا جاسکتا ہے: ڈی سی اسلام آباد

عثمان خادم کمبوہ اتوار 31 مئی 2020 11:39

اسلام آباد (اردوپوائنٹ اخبارتازہ ترین۔31 مئی 2020ء) وفاقی دارالحکومت میں ماسک پہننا لازمی قرار دیدیا گیا ہے۔ ڈپٹی کمشنر اسلام آباد حمزہ شفقات نے اعلان کیا ہے کہ شہر میں تمام عوامی جگہوں بشمول مارکیٹس، مساجد، پبلک ٹرانسپورٹ، لاری اڈہ، گلیوں، سڑکوں اور دفاتر میں ماسک پہننا لازمی ہے۔ انہوں نے بتایا ہے کہ اس حوالے سے انتظامیہ چیکنگ بھی کرے گی اور مجسٹریٹ کی جانب سے ماسک نہ پہننے والوں کو 3ہزار تک جرمانہ ہوگا اور خلاف ورزی کرنے والے کو جیل بھی بھیجا جاسکتا ہے۔

ڈی سی اسلام آباد نے ٹویٹر پیغام میں ماسک پہننے کے حوالے سے جاری کردہ حکم کی اطلاع دی ہے۔

اسلام آباد میں تمام عوامی جگہوں پر ماسک پہننا /منہ ڈھانپنا اب لازم قراردیدیاگیا ہے۔ مارکیٹس،عوامی مقامات مساجد،پبلک ٹرانسپورٹ،لاری اڈہ،گلیوں،سڑکوں، دفاتر میں چیکنگ ہوگی۔ مجسٹریٹ تین ہزار تک جرمانے اور دفعہ 188 تعزیرات پاکستان کے تحت جیل بھی بھیجا جا سکتا ہے https://t.co/meI0kcjkU5
— DC Islamabad (@dcislamabad) May 31, 2020

یہ فیصلہ وفاقی حکومت کی جانب سے ملک بھر میں ماسک کو لازمی قرار دینے کے بعد سامنے آیا ہے۔

(جاری ہے)

گزشتہ روز معاون خصوصی برائے صحت ڈاکٹر ظفرمرزا نے کہا تھا کہ پُرہجوم مقامات پر ماسک پہننا لازمی قرار دے دیا ہے، ماسک پہننے پر عملدرآمد کروایا جائے گا، یہ اب کسی کیلئے آپشن یا خواہش نہیں ہوگی، لوگ نوٹ کرلیں کہ اب پُرہجوم جگہوں ، مساجد ، پبلک ٹرانسپورٹ، بازاروں، دکانوں، شاپنگ مالز پر ماسک پہننا لازمی کردیا گیا ہے۔

انہوں نے کہا کہ پاکستان میں کورونا وائرس مقامی سطح پر تیزی سے پھیل رہا ہے، مقامی وائرس پھیلاؤ کا تناسب 92 فیصد ہوچکا ہے۔مستقبل میں ہمارے ہاں کیسز اور اموات بڑھنے کا امکان ہے۔ پچھلے 24 گھنٹے جو اموات ہوئیں، ان میں ہمارے چار ہیلتھ ورکرز بھی تھے، میں تمام شہداء کے اہلخانہ سے اظہار تعزیت کرتا ہوں۔ کورونا سے نمٹنے کیلئے حکومت بڑے اقدامات اٹھا رہی ہے۔

انہوں نے کہا کہ کچھ چیزوں کی نشاندہی کرنا چاہتا ہوں کہ سوشل میڈیا پرکچھ ذمہ دار لوگ بھی غلط پیغام رسانی کرتے ہیں،کل سوشل میڈیا پر ایک نامور عالم کہہ رہا تھا کہ اگر کسی کا مثبت ٹیسٹ آیا توکورونا مریض ہسپتال نہ جائیں، ہسپتال میں اچھا سلوک نہیں کیا جائے گا۔ میں میڈیا اور تجزیہ کاروں سے درخواست کرتا ہوں کہ لوگوں کی رہنمائی کریں، اور خدارا ایسی افواہوں پر کان نہ دھریں۔