اپوزیشن والے سن لیں پاکستان اور عمران خان ساتھ ساتھ چلیں گے ،ہمایوں اختر خان

ہفتہ 4 جولائی 2020 13:06

لاہور (اُردو پوائنٹ اخبارتازہ ترین - اے پی پی۔ 04 جولائی2020ء) پاکستان تحریک انصاف کے سینئر مرکزی رہنما و سابق وفاقی وزیر ہمایوں اختر خان نے کہا ہے کہ اپوزیشن والے سن لیں پاکستان اور عمران خان انشاء اللہ ساتھ ساتھ چلیں گے لیکن کرپشن اور پاکستان ساتھ ساتھ نہیں چل سکتے ،مسلم لیگ(ن) اور پیپلزپارٹی کی قیادت نے اپنے ادوار میں عوام اور ملک کیلئے سوچنے کی بجائے اپنے اور اپنے حواریوں کے بارے میںسوچا اور ان کے ذاتی کاروبار دن دگنی رات چوگنی ترقی کرتے رہے ،مسلم لیگ(ن) اور پیپلز پارٹی وسط مدتی انتخابات کا مطالبہ کرنے سے پہلے عوام کو اپنے کارکردگی بتائیں۔

ان خیالات کا اظہار انہوں نے انصاف ٹریڈرز ونگ کے رہنمائوںاور حلقہ این اے 131کے متحرک رہنمائوںسے گفتگو کرتے ہوئے کیا۔

(جاری ہے)

ہمایوں اختر خان نے کہاکہ اگر ہم نے پاکستان کو آگے لے کر جانا ہے تو کرپشن کے ناسور کوجڑ سے اکھاڑنا پھینکنا ہوگا۔ وزیر اعظم عمران خان نے کرپشن کے خلاف زیرو ٹالرنس پالیسی اور مافیاز کو بے نقاب کرنے کیلئے غیر معمولی فیصلے کئے ہیں ، ملک میں پنجے گاڑھنے والے یہ عناصر مزاحمت کررہے ہیںلیکن انہیں بالآخر قانون کے دائرے میں لا یا جائے گا۔

انہوں نے کہا کہ تحریک انصاف کی حکومت کو پانچ سال کا مینڈیٹ ملا ہے اور حکومت اپنی آئینی مدت پوری کرے گی ، سازشیں کرنے والے ہمیشہ کی طرح نا مراد ہی رہیںگے اور پاکستان مراد پائے گا۔وزیر اعظم عمران خان بے خوف لیڈر ہیں اور انہوںنے ہر کڑے وقت میں اپنے فیصلوں سے ثابت بھی کیا ہے۔ انہوں نے مزید کہا کہ پارٹی رہنما اورکارکنان مشکلات کے باوجود حکومت کے بہترین اقدامات کو عوام کے سامنے لائیں۔