کراچی کے علاقوں ناظم آباد اور خواجہ اجمیر نگری میں پولیس کی کارروائی،قتل اور ڈکیتی کی وارداتوں میں ملوث 3 ملزمان گرفتار

ہفتہ 4 جولائی 2020 16:32

کراچی(اُردو پوائنٹ اخبارتازہ ترین - این این آئی۔ 04 جولائی2020ء) کراچی کے علاقوں ناظم آباد اور خواجہ اجمیر نگری میں پولیس نے کارروائی کر کے قتل اور ڈکیتی کی وارداتوں میں ملوث 3 ملزمان کو گرفتار کر لیاہے۔ایس ایس پی ایس آئی یو عرفان بہادر کے مطابق قتل اور ڈکیتی کی وارداتوں میں ملوث گروہ کے سرغنہ کو ناظم آباد سے گرفتار کیا گیا۔انہوں نے بتایا کہ اسپیشل انویسٹی گیشن یونٹ کراچی نے ناظم آباد کے علاقے میں خفیہ اطلاع پر ٹارگیٹڈ کارروائی کرتے ہوئے شہر میں ڈکیتی اور قتل کی درجنوں وارداتوں میں مطلوب ڈکیت گروہ کے سرغنہ کو گرفتار کر لیا۔

ملزم سے غیر قانونی اسلحہ بمعہ ایمونیشن اور چھینی گئی موٹرسائیکل برآمد کر لی گئی۔گرفتار ملزم نے تفتیش کے دوران 2019 میں تھانہ سائٹ اے کے علاقے میں فیکٹری کے منیجر سے 27 لاکھ روپے کی رقم لوٹنے کے بعد اسے قتل کرنے کا انکشاف کیا ہے۔

(جاری ہے)

گرفتار ملزم نے 2018 میں تھانہ فیڈرل بی ایریا کے علاقے میں ڈکیتی کے دوران سیکیورٹی گارڈ کو قتل کرنے کا بھی اعتراف کیا ہے۔

گرفتار ملزم شہر کے مختلف علاقوں میں پولیس پر حملوں میں بھی ملوث تھا، جبکہ ڈکیتی کی وارداتوں کے لیے منصوبہ سازی کیا بھی کرتا تھا۔ملزم سے برآمد کی گئی موٹر سائیکل تھانہ رضویہ کے علاقے سے چھینی گئی تھی، ملزمان کا گینگ کراچی کے مختلف علاقوں میں قتل اور ڈکیتی کی درجنوں وارداتوں میں ملوث تھا۔گرفتار ملزم کے خلاف پولیس پر حملے، قتل اور ڈکیتی سمیت دیگر نوعیت کے درجنوں مقدمات شہر بھر کے تھانوں میں درج ہیں۔

ایک اور چھاپہ مار کارروائی میں اسپیشل انویسٹی گیشن یونٹ کراچی نے خواجہ اجمیر نگری کے علاقے سے 2 رکنی ڈکیت گروہ کو گرفتار کر کے وارداتوں میں استعمال ہونے والا اسلحہ برآمد کر لیا۔گرفتار ملزمان غلام علی ولد غلام حیدر اور غلام فرید ولد الہی بخش بینکوں سے رقم لے کر نکلنے والے شہریوں کو لوٹتے تھے۔ملزمان نے تفتیش کے دوران اب تک 7 سے زائد شہریوں کو لاکھوں روپے کی رقم سے محروم کرنے کا اعتراف کیا ہے۔گرفتار ملزمان کا مزید کریمنل ریکارڈ اکٹھا کیا جا رہا ہے جبکہ ان کے خلاف اسپیشل انویسٹی گیشن یونٹ میں مقدمہ بھی درج کیا گیا ہے۔گرفتار ملزمان سے تفتیش کی جا رہی ہے جس کے بعد مزید گرفتاریاں اور انکشافات متوقع ہیں، ملزم سے برآمد اسلحہ فارنزک کے لیے روانہ کیا گیا ہے۔