متحدہ عرب امارات میں ایک بار پھر کورونا کیسز میں اضافہ ہو گیا

گزشتہ 24 گھنٹوں کے دوران 435 افراد میں کورونا کی تشخیص ہو گئی، مرنے والوں کی گنتی 367 تک جا پہنچی

محمد عرفان بدھ 19 اگست 2020 16:20

متحدہ عرب امارات میں ایک بار پھر کورونا کیسز میں اضافہ ہو گیا

دُبئی(اُردو پوائنٹ تازہ ترین اخبار۔ 19اگست 2020ء) متحدہ عرب امارات میں چند روز قبل کورونا کے یومیہ کیسز کی گنتی 250 سے بھی نیچے چلی گئی تھی تاہم اب ایک بار پھر مملکت میں کورونا کے یومیہ کیسز میں اضافہ ہونے لگا ہے۔ گزشتہ 24گھنٹوں کے دوران 435 افراد میں کورونا کیسز کی تشخیص ہوئی ہے۔ جس نے حکام میں تشویش کی لہر دوڑا دی ہے۔ گزشتہ روز کورونا کا ایک اور مریض جاں بحق ہو گیا جس کے بعد کورونا سے ہلاک ہونے والوں کی کُل گنتی 367 ہو گئی ہے۔

وزارت صحت کی آج کی پریس بریفنگ میں مزید بتایا گیا ہے کہ نئے مریضوں کی تشخیص کے بعد مملکت میں کورونا کیسز کی مجموعی گنتی65,341 تک جا پہنچی ہے۔جبکہ زیر علاج افراد کی گنتی 7ہزار سے زائد ہے۔گزشتہ چوبیس گھنٹوں میں کورونا کے113 مریض صحت یاب ہو گئے۔

(جاری ہے)

اسی طرح اب تک مملکت میں کورونا کے58,022 مریض صحت یاب ہو کر گھروں کو لوٹ چکے ہیں۔ گزشتہ چند روز کے دوران کورونا کے مزید72 ہزار ٹیسٹ لیے گئے۔

اب تک مجموعی طور پر58 لاکھ سے زائد افراد کے کورونا ٹیسٹ لیے جا چکے ہیں، جن کا تعلق مختلف علاقوں اور پیشوں سے ہے۔ واضح رہے کہ اماراتی وزارت صحت نے خبردار کیا ہے کہ گھروں میں قرنطینہ اختیار کرنے والے افراد کو ٹیسٹ کی رپورٹ نیگیٹو آنے تک گھر سے باہر نکلنے کی اجازت نہیں ہو گی۔واضح رہے کہ حکومت کی جانب سے خبردار کیا گیا ہے کہ کورونا ٹیسٹ مثبت آنے والوں کوگھریلو قرنطینہ کی پہلی بار خلاف ورزی پر پچاس ہزار درہم کا جرمانہ ہو گا، جبکہ دوسری بار اس خلاف ورزی پر ایک لاکھ درہم کا جرمانہ اور چھ ماہ تک قید ہو گی۔

وزارت کے مطابق دو قسم کے افراد گھریلو قرنطینہ اختیار کریں گے، پہلے تو وہ لوگ جن کے کورونا ٹیسٹ پازیٹو آنے کے باعث وہ مصدقہ مریض بن چکے ہوں، جبکہ جو افراد کورونا کے تصدیق شدہ مریضوں سے رابطے میں رہے ہوں گے، انہیں بھی خود کو اور اس بارے میں محکمہ صحت کا بھی آگاہ کرنا ہو گا۔ ان افراد کو اس وقت تک گھروں سے نکلنے کی اجازت نہیں ہو گی، جب تک ان کے ٹیسٹ نیگیٹو نہیں آئیں گے۔

گھروں پر قرنطینہ اختیار کرنے والوں کو الیکٹرانک بریسلیٹ پہننی ہو گی، جو محکمہ صحت کی جانب سے فراہم کی جا رہی ہے، تاکہ حکام کو کسی شخص کی جانب سے خلاف ورزی کی صورت میں فوری پتا چل جائے۔ اس کے علاوہ کورونا کا ٹیسٹ مثبت آنے کی صورت میں الحوسن ایپ بھی سمارٹ فونز پر ڈاوٴن لوڈ کرنا ہو گی اور اس پر اپنی رجسٹریشن کروانا لازمی ہے۔