وزیر صحت پنجاب کی پروونشل لانچ آف گلوبل بریسٹ فیڈنگ ویک2020میں بطورمہمان خصوصی شرکت

محکمہ صحت پنجاب تمام سٹیک ہولڈرز کے ساتھ مل کر بریسٹ فیڈنگ کے رجحان کو بڑھانے کیلئے اقدامات اٹھارہاہے،ماں اور بچے کی صحت کو یقینی بنانے کیلئے صوبہ میں اسٹیٹ آف دی آرٹ مدراینڈ چائلڈ ہسپتال بنائے جارہے ہیں۔ ڈاکٹریاسمین راشد

بدھ 23 ستمبر 2020 20:33

وزیر صحت پنجاب کی پروونشل لانچ آف گلوبل بریسٹ فیڈنگ ویک2020میں بطورمہمان ..

لاہور۔ (اُردو پوائنٹ اخبارتازہ ترین - اے پی پی۔ 23 ستمبر2020ء) صوبائی وزیر صحت پنجاب ڈاکٹریاسمین راشدنے بدھ کے روز یہاں محکمہ پلاننگ اینڈ ڈویلپمنٹ میں پراونشل لانچ آف گلوبل بریسٹ فیڈنگ ویک2020میں بطورمہمان خصوصی شرکت کی۔اس موقع پر سیکرٹری محکمہ پاپولیشن ویلفیئر علی بہادرقاضی،پرنسپل سروسز انسٹی ٹیوٹ آف میڈیکل سائنسز پروفیسر ڈاکٹر محمودایاز،ڈین انسٹی ٹیوٹ آف پبلک ہیلتھ ڈاکٹر زرفشاں طاہر،ایگزیکٹو ڈائریکٹرہیلتھ پلاننگ اینڈ ڈویلپمنٹ ڈاکٹرسہیل ثقلین،پروفیسرآف گائنی روبینہ سہیل اور عالمی ادار ہ صحت کے نمائندہ ڈاکٹریحییٰ گلزار کے علاوہ مختلف محکمہ جات کے افسران نے شرکت کی۔

ڈاکٹرسہیل ثقلین نے گلوبل بریسٹ فیڈنگ ویک کی اہمیت پر روشنی ڈالی اور صوبائی وزیر صحت کی آمد پر ان کا شکریہ اداکیا۔

(جاری ہے)

صوبائی وزیرصحت نے کہاکہ ماں کا دودھ بچے کی نشوونماء کیلئے بنیادی اہمیت کا حامل ہے،بریسٹ فیڈنگ کی اہمیت کو اجاگرکرنے کیلئے علماء کرام کا کردارانتہائی اہم ہے،پاکستان میں بچوں کی نشوونما رکنے کا بہت بڑا مسئلہ ہے،بچوں کی نشوونماء رکنے کی بہت بڑی وجہ بریسٹ فیڈنگ کا نہ ہوناہے۔

ڈاکٹریاسمین راشدنے کہاکہ محکمہ صحت پنجاب تمام سٹیک ہولڈرز کے ساتھ مل کر بریسٹ فیڈنگ کے رجحان کو بڑھانے کیلئے اقدامات اٹھارہاہے،ماں کے دودھ کی اہمیت کے حوالہ سے وسیع پیمانے پرآگاہی مہم شروع کرنے کی اشدضرورت ہے۔انہوں نے کہا کہ محکمہ صحت پنجاب ورکنگ پلیسز پر ماؤں کیلئے آسانیاں پیداکررہاہے،بچے کو صحت مندزندگی دینے کیلئے ماں کو اپنا دودھ ضرورپلاناچاہئے،بچے کو دودھ نہ پلانے کی وجہ سے ماں کے اندرخون کی کمی پیداہوجاتی ہے۔

صوبائی وزیر صحت نے کہاکہ بریسٹ فیڈنگ کے حوالہ سے ماؤں کی باقاعدہ کونسلنگ ہونی چاہئے،ماں کے دودھ سے بچے کے اندرقوت مدافعت پیداہوتی ہے،بچے کی پیدائش کے پہلے دوسال تک ماں کا دودھ بہت اہم ہے،وزیراعظم عمران خان نے اپنی پہلی تقریر میں ماں اور بچے کی صحت کو محفوظ بنانے پر زوردیا۔ انہوں نے مزیدکہاکہ ماں اور بچے کی صحت کو یقینی بنانے کیلئے صوبہ میں اسٹیٹ آف دی آرٹ مدراینڈ چائلڈ ہسپتال بنائے جارہے ہیں،محکمہ صحت نے انتہائی محنت سے کوروناوائرس کا مقابلہ کیاہے،محکمہ صحت پنجاب نے تیس ہزارڈاکٹرز کو میرٹ پربھرتی کیاہے،پنجاب کے سرکاری ہسپتالوں میں آنے والے مریضوں کیلئے آسانیاں پیداکررہے ہیں۔