27 ستمبر کو یہ ثابت ہوجائے گا کہ کراچی کے عوام کرپٹ حکمرانوں سے نفرت وجان چھڑانا چاہتے ہیں،ممتاز سہتو

ہفتہ ستمبر 17:29

کراچی (اُردو پوائنٹ اخبارتازہ ترین - این این آئی۔ 26 ستمبر2020ء) جماعت اسلامی سندھ کے نائب امیر ممتاز حسین سہتو نے کہا ہے کہ شہر کراچی پاکستان کے عوام کیلئے شجر سایہ دار کی حیثیت رکھتا ہے، ملک بھر سے یہاں آکر غریب مزدور سکھ کا سانس ،آب وہوا اور ترقی سے لطف اندوز ہوتا تھا، لیکن افسوس کی بات ہے کہ حکمرانوں کی غلط پالیسیوں، کرپشن اور نااہلی کی وجہ سے کراچی اب ایک اجڑا ہوا شہر محسوس ہوتا ہے۔

کسی بھی حوالے سے قابل تعریف نہیں ہے بلکہ ہر شعبہ زندگی کراہت کی تصویر بنا ہوا ہے، تازہ بارشوں نے حکمران ٹولے کی نااہلی کی سبب کراچی کے عوام کی زخموں پر مرہم رکھنے کی بجائے نمک چھڑکنے کا کام کیا۔ ایسی صورتحال میں جماعت اسلامی نے مجبور ومظلوم عوام کی انگلی پکڑ کر اسے سہارا دینے کی کوشش کی ہے۔

(جاری ہے)

لیکن حکمرانوں نے ابھی تک اس کا نوٹس نہیں لیا ہے، اس وقت عوامی غصہ وغضب سے بھپری ہوئی ہے جس کا اظہار 27ستمبر کو جماعت اسلامی کراچی کی ریلی میں ہوگا۔

یہ ریلی جماعت اسلامی کے کارکنان کی نہیں بلکہ کراچی کے عوام کی ہوگی 27 ستمبر کو یہ ثابت ہوجائے گا کہ کراچی کی عوام ان کرپٹ حکمرانوں سے نفرت کرتے ہیں ان سے جان چھڑانے کیلئے اب میدان عمل میں آچکے ہیں۔ کراچی کے مسائل کا ایک ہی حل ہے کہ کرپٹ اور نااہل قیادت سے آزادی حاصل کرکے صالح قیادت کو اآگے لایا جائے۔ جماعت اسلامی کا ماضی گواہ ہے کہ جب بھی جماعت اسلامی کو موقع ملا ہے انہوں نے اپنی صلاحیت اور صالحیت سے عوام کی خدمت کی ہے، اب بھی کراچی ہو یا پورا ملک جو مسائل کا شکار ہیں انکے تمام مسائل کا حل اسلامی پاکستان اور خوشحال پاکستان ہے۔

کراچی جماعت اسلامی کے کارکنان وقیادت قابل تعریف ہیں کہ انہوں نے دن رات ایک کرتے ہوئے کراچی کے عوام کی خدمت کی ہے اور انہیں ظلم کیخلاف منظم کرنے اور اسلامی انقلاب کی تیاری کیلئے کوشش جاری رکھی ہوئی ہے۔