ورلڈ مینٹل ہیلتھ ڈے ہمیں ذہنی مرض میں مبتلامریضوں کا خاص خیال رکھنے کا پیغام دیتاہی` ڈاکٹر یاسمین راشد

لاہور (اُردو پوائنٹ اخبارتازہ ترین - اے پی پی۔ 06 اکتوبر2020ء) : وزیر صحت پنجاب ڈاکٹر یاسمین راشدنے کہا ہے کہ دماغی صحت کا عالمی دن ہمیں ذہنی مرض میں مبتلامریضوں کا خاص خیال رکھنے کا پیغام دیتاہے،ذہنی معذوری کے شکار مریض زیادہ توجہ کے مستحق ہوتے ہیں،حکومت پنجاب ذہنی معذوری کے شکار مریضوں کی بحالی کیلئے بنیادی اقدامات اٹھا رہی ہے۔ان خیالات کا اظہار انہوں نے کنگ ایڈورڈ میڈیکل یونیورسٹی میں ورلڈ مینٹل ہیلتھ ڈے کی مناسبت سے منعقدہ آگاہی سیمینار سے خطاب کرتے ہوئے کیا۔

اس موقع پر وائس چانسلرکنگ ایڈورڈ میڈیکل یونیورسٹی پروفیسرڈاکٹر خالدمسعودگوندل،سی ای او مئیو ہسپتال پروفیسرڈاکٹر اسداسلم خان،ڈاکٹر آفتاب آصف،پروفیسرڈاکٹر عائشہ شوکت،پروفیسرڈاکٹر بلقیس اور ڈاکٹرعلی ہاشمی کے علاوہ فیکلٹی ممبران و طلبائ و طالبات کی کثیرتعدادنے بھی شرکت کی۔

(جاری ہے)

صوبائی وزیر صحت نے کہاکہ جسمانی صحت کے ساتھ ساتھ ذہنی صحت بھی بہت اہم ہے،ذہنی تنا ومیں مبتلامریض کے ساتھ ساراخاندان متاثرہوجاتاہے،جسمانی بیماری کی نسبت ذہنی معذوری خاندان والوں کو زیادہ متاثر کرتی ہے۔

ڈاکٹریاسمین راشدنے کہاکہ پاکستان میںلاکھوں افراد ذہنی معذوری کے مرض میں مبتلا ہیں،ذہنی معذوری کے شکار مریض زیادہ توجہ کے مستحق ہوتے ہیں۔صوبائی وزیر نے مزید کہاکہ حکومت پنجاب ذہنی معذوری کے شکار مریضوں کی بحالی کیلئے بنیادی اقدامات اٹھا رہی ہے،کورونا وائرس کے دوران کنگ ایڈورڈ میڈیکل یونیورسٹی کے ڈیپارٹمنٹ آف سائیکیٹری نے اہم کردار اداکیا ہے،ٹیلی میڈیسن کے شعبہ کو پاکستان سمیت پوری دنیا میں سراہاگیا ہے،کورونا وائرس کے دوران پاکستان سمیت مختلف ممالک سے ہزاروں افراد نے ٹیلی میڈیسن کے شعبہ سے رہنمائی حاصل کی ہے۔

وائس چانسلر کنگ ایڈورڈمیڈیکل یونیورسٹی پروفیسر ڈاکٹر خالدمسعودگوندل نے کہاکہ صوبائی وزیر نے بطور وزیر، سکالر اور استاد ہمیشہ رہنمائی فرمائی ہے اورہر اہم موضوع میں ان کی شرکت ذاتی دلچسپی کا منہ بولتا ثبوت ہے۔پروفیسر ڈاکٹر خالدمسعودگوندل نے وزیرصحت کو ریسرچ کے فیلڈ میںپہلے سے زیادہ محنت کرنے کی یقین دہانی کروائی۔صوبائی وزیر صحت نے آگاہی سیمینار کے آخر میں آگاہی واک کی قیادت بھی کی۔