عمران خان ایسے راستے کے متلاشی جو پالیمنٹ یا سیاستدانوں کا نہیں ہے

لاہور( اردوپوائنٹ اخبارتازہ ترین۔ 15 مئی 2024ء) وزیرمملکت پیٹرولیم مصدق ملک نے کہا ہے کہ عمران خان ایسے راستے کے متلاشی جو پالیمنٹ یا سیاستدانوں کا نہیں ہے،وہ چاہتے جن سے لڑائی ہوئی انہی سے بات کی جائے، ٹاک ٹاک فائٹ فائٹ والی صورتحال ہے، عمران خان کبھی کہتا چھوڑوں گا نہیں، پھر کہتا کہ بات بھی تم سے ہی کروں گا۔ انہوں نے جیو نیوز کے پروگرام میں گفتگو کرتے ہوئے کہا کہ عمران خان کبھی پریشر ڈالتے، کبھی کہتے گریبان پر ہاتھ ڈالوں گا ، میں چھوڑوں گا نہیں، پھر کہتا کہ بات صرف تم سے ہی کروں گا، کہتا سیاستدانوں سے کیوں بات کروں؟ جب عمران خان کو جواب ملتا کہ بات نہیں ہوگی پھر کہتا گریبان پکڑوں گا، وہ کہتے پکڑ کے دکھا، پھر کہتا بات تو تم سے ہی کروں گا ، عجیب سی گفتگو چل رہی ہے، بظاہر لگتا ہے کہ عمران خان کسی راستے کے متلاشی ہیں، لیکن وہ پالیمنٹ یا سیاستدانوں کا راستہ نہیں ہے، وہ چاہتے جن سے لڑائی ہوئی انہی سے بات کی جائے۔

(جاری ہے)

پی ٹی آئی رہنماؤں کے بیانات میں تضاد ہے، ٹاک ٹاک فائٹ فائٹ ، مینڈیٹ کی بات کی جاتی ، مینڈیٹ جو 2018میں بھی چوری ہوا تھا، اس کے باوجود ہم نے میثاق معیشت کی بات کی۔ بتایا جائے پی ٹی آئی کے کون سے جمہوری رویے ہیں۔ اس موقع پر پی ٹی آئی کے رکن اسمبلی زین قریشی نے کہا کہ ہمارا مطالبہ ہے کہ ہمارے جیلوں میں قید لوگوں کو رہا کیا جائے، 9مئی واقعے پر کمیشن بنایا جائے، جو مینڈیٹ چوری ہوا وہ واپس کیا جائے، ہم ایک سیاسی جماعت ہیں کیوں نہ بات کریں۔ پی ڈی ایم ہے جو کہتی گلے پڑ جاؤ یا پاؤں پڑ جاؤ، عمران خان کے خلاف کیسز میں کچھ نہیں ہے، عدالتوں سے ضمانت کے بعد عمران خان کو رہا کیا جائے، سب کو مل کر بات کرنا ہوگی کہ ہم کب تک انتخابات کو متنازع بناتے رہیں گے۔