برطانوی نژاد باکسر عامر خان بھی پاکستان کی سیاست میں آنے کی خواہش ظاہر کر دی

لندن (اُردو پوائنٹ اخبارتازہ ترین - این این آئی۔ 20 اکتوبر2020ء) برطانوی نژاد باکسر عامر خان نے پاکستان کی سیاست میں آنے کی خواہش ظاہر کر دی سماجی رابطے کی سائٹ ٹوئٹر پر عامر خان نے ملکی سیاست میں حصہ لینے پر آمادگی ظاہر کرتے ہوئے کہا کہ مجھ سے بہت مرتبہ پوچھا گیا کہ کیا میں پاکستان میں سیاست میں حصہ لوں گا، بطور ایک کھلاڑی اور ملکی سفیر، یہ قابل عزت ہے کہ مجھ سے پوچھا گیا کہ میں سیاست میں حصہ لوں گا، حقیقت میں ملک کی مدد کرنا پسند کروں گا، فلپائن میں مینی پیکئو ئیاؤ کی اس کے ملک کے لیے عظیم خدمات دیکھ چکا ہوں لہذا مجھے علم ہے کہ میں بھی ایسا ہی پاکستان کے لیے کر سکتا ہوں۔

باکسر عامر خان نے کہا کہ یہ ایک بہت بڑا فیصلہ ہوگا تاہم ہوسکتا ہے کہ میں ایک روز اس پر غور کروں، میں اپنے پرستاروں سے پوچھنا چاہوں گا کہ وہ اس بارے میں کیا سوچتے ہیں، میں نے ملک میں بہت سے سیاستدانوں اور آرمی جرنیلوں سے اس معاملے پر نشستیں کی ہیں جنہوں نے ملکی موضوعات پر اتفاق اور اختلاف کیا، میرا دل صاف ہے اور میں پاکستان کے لیے بہترین چاہوں گا۔

(جاری ہے)

عامر خان نے کہاکہ میرے پرانے دوست اور عالمی چمپئن باکسر مینی پیکئو ئیاؤ نے سیاست میں شمولیت اختیار کی ہے، میں بھی پاکستان کو ایک بہتر جگہ بنانا چاہتا ہوں، میں بہت سے شعبوں بشمول کھیل، تعلیم، چائلڈ لیبر کو روکنے اور بہت سی چیزوں میں بہت مددگار ثابت ہونا چاہتا ہوں، ہم سب نے ایک روز اس جہاں کو چھوڑ جانا ہے مگر جب تک ہم یہاں ہیں ہمیں اپنا کردار ادا کرنا چاہیے۔