Live Updates

کرکٹ میچز اورایشیاء کپ کے تناظر میں لاہور پولیس کا قمار بازوں کے خلاف کریک ڈائون

بدھ 17 ستمبر 2025 14:02

لاہور (اُردو پوائنٹ اخبارتازہ ترین - این این آئی۔ 17 ستمبر2025ء) صوبائی دارالحکومت میںمنعقدہ کرکٹ میچز اور ایشیاء کپ کے تناظر میں لاہور پولیس کا قماربازوں کے خلاف کریک ڈائون جاری ہے۔ترجمان لاہور پولیس نے بتایا کہ رواں سال قمار بازی میں ملوث2791ملزمان کی گرفتاری عمل میں لا کرشہر کے مختلف تھانوں میں713مقدمات کا اندراج کیا گیا ہے۔گرفتار ملزمان کے قبضے سی1کروڑ30لاکھ83ہزارروپے سے زائددائو پر لگی رقم برآمد کی گئی ہے۔

سی سی پی او بلال صدیق کمیانہ نے لاہورپولیس کو جوئے کے اڈوں اور آن لائن جوئے کے خلاف کریک ڈاؤن تیز کرنے کے احکامات جاری کرتے ہوئے کہا کہ نوجوانوں کا مستقبل دائو پر لگانے والوں کے ساتھ کسی قسم کی رعایت نہیں برتی جائے گی۔سی سی پی اولاہور نے کہا کہ جوئے کے اڈوں پر انٹیلی جنس بیسڈ ریڈ کروائے جائیں۔

(جاری ہے)

انہوں نے کہا کہ آن لائن گیمبلنگ میں ملوث عناصر کے گرد گھیرا تنگ کیا جائے۔

بلال صدیق کمیانہ نے کہا کہ پولیس افسران جوئے کے اڈوں اور آن لائن گیمبلنگ کی نشاندہی کیلئے جدید ٹیکنالوجی سے بھرپور استفادہ کریں۔انہوں نے کہا کہ محکمہ پراسیکیوشن کی معاونت سے جوئے میں ملوث عناصرکو منطقی انجام تک پہنچایا جائے ۔سی سی پی او لاہور نے کہا کہ آن لائن جوئے سمیت تمام فراڈ ایپلی کیشنز پر کڑی نظر رکھی جائے۔انہوں نے اس عزم کا اظہار کیا کہ جرائم سے پاک معاشرے کا قیام ہمارا مشن ہے۔