لاہور کے مشہورلبرٹی چوک کا نام تبدیل کرنے کی خبر ’’جعلی‘‘ قرار

نجی ٹی وی چینل کی جانب سے لبرٹی چوک کا نام تبدیل کیے جانے کی خبر ’’ فیک نیوز‘‘ ہے ، وزیراعلیٰ پنجاب کے فوکل پرسن برائے ڈیجیٹل میڈیا اظہر مشوانی کا ٹوئٹ

شہریار عباسی ہفتہ 21 نومبر 2020 01:19

لاہور کے مشہورلبرٹی چوک کا نام تبدیل کرنے کی خبر ’’جعلی‘‘ قرار

لاہور (اُردوپوائنٹ اخبار تازہ ترین۔ 20 نومبر2020ء) حکومت پنجاب نے لاہور کے مشہور لبرٹی چوک کا نام تبدیل کرنے کی خبر غلط قرار دے دی ہے۔ سماجی رابطوں کی ویب سائٹ ٹوئٹر پر جاری ایک ٹوئٹ میں فوکل پرسن برائے ڈیجیٹل میڈیا وزیراعلیٰ پنجاب اظہر مشوانی نے چوک کا نام تبدیل ہونے کی خبر کو ’’فیک نیوز‘‘ قرار دیا ہے ۔ انہوں نے ایک نجی چینل کی خبر ’’لبرٹی چوک کا نام رین بو اسکوائر رکھ دیا گیا‘‘ کی تصویر شیئر کرتے ہوئے لکھا کہ یہ فیک نیوز ہے۔

⚠️🚫 Fake News 🚫⚠️ pic.twitter.com/jZil4LSCmd
— Azhar Mashwani (@MashwaniAzhar) November 20, 2020

واضح رہے کہ گزشتہ روز سے سوشل میڈیا پر یہ خبر گردش کررہی تھی کہ لاہور لبرٹی چوک کا نام تبدیل کردیا گیا ہے، جبکہ آج ایک نجی ٹی وی چینل نے بھی خبر دی تھی کہ لبرٹی چوک کا نام تبدیل کر کے رین بو اسکوائر رکھ دیا گیا ہے۔

(جاری ہے)

انتظامیہ نے لبرٹی چوک کو دھنک کے مختلف رنگوں سے پینٹ بھی کردیا ہے اور اسے قوس و قزح جیسی شکل میں ڈھالنے کی کوشش کی ہے۔

اس خبر کو حکومت پنجاب کی جانب سے جعلی قرار دے دیا گیا ہے۔ یاد رہے کہ ضلعی انتظامیہ کی طرف سے ’سوہنا لاہور‘ مہم جاری ہے جس کے تحت ایک نجی پینٹ کمپنی کے تعاون سے لبرٹی سے ملحقہ شاہراہ کو قوس قزح کے سات رنگوں کے مطابق رنگ دیا گیا ہے، لبرٹی چوک کو سبز، پیلے ، لال ، نیلے ، گلابی ، سرخ اور ہلکے جامنی رنگوں سے سجایا گیا ہے۔