شاہ سلمان کا ایردوآن سے ٹیلی فون پر رابطہ، جی 20 سربراہ اجلاس پر بات چیت

دونوں رہنمائوں کی گفتگومیں جی ٹوئنٹی اجلاس کے سلسلے میں کی گئی کوششوں کی رابطہ کاری پر تبادلہ خیال ہوا

ہفتہ 21 نومبر 2020 16:24

شاہ سلمان کا ایردوآن سے ٹیلی فون پر رابطہ، جی 20 سربراہ اجلاس پر بات ..

ریاض (اُردو پوائنٹ اخبارتازہ ترین - این این آئی۔ 21 نومبر2020ء) سعودی فرماں روا شاہ سلمان بن عبدالعزیز نے ٹیلی فون پر ترکی کے صدر رجب طیب ایردوآن سے بات چیت کی ہے ۔غیرملکی خبررساں ادارے کے مطابق بات چیت میں سعودی عرب کی میزبانی میں ہونے والے جی ٹوئنٹی اجلاس کے سلسلے میں کی گئی کوششوں کی رابطہ کاری پر تبادلہ خیال ہوا۔ اس کے علاوہ دونوں ملکوں کے درمیان تعلقات زیر بحث آئے۔

جی ٹوئنٹی سربراہ اجلاس کے کسی بھی عرب ملک میں منعقد ہونے کا یہ پہلا موقع ہے۔

(جاری ہے)

اجلاس کے ایجنڈے میں متعدد معاملات ہیں جن میں توانائی، ماحولیات، ڈیجیٹل اکانومی، صحت اور تعلیم نمایاں ترین ہیں۔سعودی عرب جی ٹوئنٹی کے اہداف کو پورا کرنے کے لیے رکن ممالک میں اپنے شراکت داروں کے ساتھ تعاون مضبوط کرنے کا خواہاں ہے۔ اسی طرح اجلاس کی میزبانی مشرق وسطی اور شمالی افریقا کے لیے اہمیت کے حامل امور کو پیش کرنے میں کردار ادا کرے گی۔

سعودی عرب کی صدارت میں جی ٹوئٹنی اجلاس کے بیان کے مسودے میں باور کرایا گیا کہ قرضوں کے بوجھ میں نرمی کا منصوبہ ممکنہ طور پر جون 2021 تک نافذ العمل رہے گا۔کرونا کی وبا کے حوالے سے اجلاس کے اختتامی بیان میں باور کرایا گیا کہ کووڈ 19 نے معاشرے کے زیادہ کمزور طبقوں کو شدید طور سے متاثر کیا۔