پاکستانیوں کو لیبر ویزوں کے اجراء پر کوئی پابندی نہیں

حکومت پاکستان کی جانب سے رابطہ کیے جانے پر اماراتی حکومت نے وضاحت کر دی

محمد علی جمعرات 26 نومبر 2020 19:24

اسلام آباد (اردوپوائنٹ اخبار تازہ ترین۔ 26 نومبر2020ء) پاکستانیوں کو لیبر ویزوں کے اجراء پر کوئی پابندی نہیں، حکومت پاکستان کی جانب سے رابطہ کیے جانے پر اماراتی حکومت نے وضاحت کر دی۔ تفصیلات کے مطابق گزشتہ کچھ روز سے خبریں زیر گردش تھیں کہ متحدہ عرب امارات نے پاکستانیوں کو نئے ویزٹ ویزوں کے علاوہ ورک ویزوں کے اجراء پر بھی پابندی عائد کر دی ہے، تاہم اس حوالے سے اماراتی حکومت کی جانب سے کوئی باقاعدہ اعلامیہ جاری نہیں کیا گیا۔

ایسی خبریں سامنے آنے کے بعد وزیراعظم عمران خان کے معاون خصوصی برائے اوورسیز پاکستانیز زلفی بخاری کی جانب سے اماراتی وزیر برائے افرادی قوت سے رابطہ کیا گیا۔

2/2
-Workers including Pakistanis laid off during #Covid19 registered on Virtual Labour Market Database are given priority
-10yr golden visa applications are also being encouraged
Looking forward to continued collaboration with UAE leadership to address the issues of our diaspora
— Sayed Z Bukhari (@sayedzbukhari) November 26, 2020

سماجی رابطوں کی ویب سائٹ ٹوئٹر پر جاری پیغام میں زلفی بخاری کی جانب سے بتایا گیا کہ اماراتی وزیر نے پاکستانی ورک فورس کیلئے ویزا پابندی کی خبروں کو مسترد کردیا۔

(جاری ہے)

وزیر افرادی قوت ناصربن الثانی نے واضح کیا کہ پاکستانی محنت کشوں کیلئے ویزوں کے اجراء پر کوئی پابندی نہیں کی گئی۔ زلفی بخاری کا بتانا ہے کہ میڈیا پر گردش کرنے والی خبروں کی برعکس اماراتی وزیر نے بتایا کہ متحدہ عرب امارات میں پاکستانی ورک فورس کی تعداد میں11فیصداضافہ ریکارڈ ہوا ہے۔ کرونا بحران کے دوران امارات میں بے روزگار ہونے والے پاکستانیوں کا ڈیٹا ورچوئل لیبر مارکیٹ کیلئے اکٹھا کیا گیا ہے، جبکہ پاکستانی پروفیشنلز کیلئے 10 سالہ گولڈن ویزوں کے اجراء کی درخواستوں پر بھی کام جاری ہے۔

معاون خصوصی زلفی بخاری نے پابندی کی خبروں کی تردید کرنے پر اماراتی وزیر کا خصوصی شکریہ ادا کیا جبکہ پاکستانیوں سے درخواست کی کہ بے بنیاد خبروں پر کان نہ دھریں۔