ایف پی سی سی آئی انتخابات کے لئے یو بی جی رہنمائوں کا ملک گیردورہ،حکمت عملی تیار

یو بی جی کی قیادت تاجروں اور حکومت کے مابین ایک مضبوط پل کا کردار ادا کررہی ہے،ایس ایم منیر،افتخار ملک

جمعہ نومبر 21:08

ایف پی سی سی آئی انتخابات کے لئے یو بی جی رہنمائوں کا ملک گیردورہ،حکمت ..
کراچی (اُردو پوائنٹ اخبارتازہ ترین - این این آئی۔ 27 نومبر2020ء) سرپرست اعلیٰ یونائیٹڈ بزنس گروپ (یو بی جی) ایس ایم منیر ، چیئرمین افتخار علی ملک ، سیکرٹری جنرل یو بی جی زبیر طفیل ، مرکزی ترجمان گلزار فیروز نے اپنے مشترکہ بیان میں کہاہے کہ یو بی جی قیادت نے اپنی بہترین پرفارمنس سے ،اپنے کردار اور کام کے ساتھ ملک بھر کی کاروباری برادری کا دل جیت لیا اور انہیں ایک چھتری کے نیچے جمع کیا ہے ۔

یونائیٹڈ بزنس گروپ نے کہا کہ 30 دسمبر 2020 کو ہونے والے ایف پی سی سی آئی انتخابات کے لئے یو بی جی نے ایک جامع حکمت عملی تیار کرکے ملک بھر کے چیمبرز اور ایسوسی ایشنز کے دورے شروع کردیئے ہیں۔ایس ایم منیر نے کہا کہ یو بی جی کی قیادت نے ایک بار پھر فیڈریشن چیمبر آف کامرس اینڈ انڈسٹری کے مفادات کے خاتمے کے مشن پر عمل پیرا ہے۔

(جاری ہے)

اس مشن پر پاکستان کی 80 فیصد سے زیادہ کاروباری برادری کے نمائندے ہمارے ساتھ ہیں ۔

ایس ایم منیر نے ایک بار پھرکہا کہ ہمیں اپنی فوج پر فخر ہے ، ہم صرف سرحدوں پر فوجی جوانوں کی موجودگی اور ان کی قربانیوں کی وجہ سے محفوظ ہیں ، بصورت دیگر ہندوستانی وزیر اعظم مودی کی نیت خراب ہے، پوری قوم پاکستان کے وقار اور سالمیت کے تحفظ کے لئے ایک جھنڈے کے نیچے کھڑی ہے اورہمیں آرمی چیف جنرل قمر جاوید باجوہ پر فخر ہے۔افتخار ملک نے کہا کہ یو بی جی کی قیادت تاجروں اور حکومت کے مابین ایک مضبوط پل کا کردار ادا کررہی ہے ، کیونکہ کاروباری برادری کا پچھلے پانچ سالوں میں یو بی جی رہنماؤں پر اعتماد ہے۔

افتخار علی ملک نے کہا کہ فیڈریشن چیمبر آف کامرس میں یو بی جی کی مسلسل پانچ سال کامیابی یونائٹیڈ بزنس گروپ کے رہنماؤں کی مثبت اجتماعی سوچ کا نتیجہ اورحق وسچ کی فتح تھی،ہم نے بزنس کمیونٹی کی خدمت کی ہے اورہمارا مشن فیڈریشن کو ایک فعال اور اسے مضبوط ادارہ بنانا ہے اور30دسمبرکو ایک بار پھر ایف پی سی سی آئی انتخابات میں ہمارا گروپ کامیاب ہوکرکاروباری برادری کے نمائندہ ادارے کودوبارہ بلند مقام دلوائے گا۔

زبیرطفیل نے کہا کہ یو بی جی قیادت نے 30 دسمبر کوہونے والے ایف پی سی سی آئی انتخابات کیلئے عہدہ صدارت پر شیخ خالد تواب ، سینئر نائب صدر کیلئے عبد الرؤف مختار سمیت نائب صدارت کی تمام نشستوں کیلئے قابل اورتعلیم یافتہ امیدوار نامزد کئے ہیں اور یہ تمام امیدوار اکثریتی ووٹوں کے ساتھ منتخب ہوں گے۔