مسلم لیگ ن کا جسٹس قاضی فائزعیسیٰ معاملے پر جوڈیشنل کمیشن بنانے کا مطالبہ

اسلام آباد ( اُردو پوائنٹ اخبار تازہ ترین - 28 اپریل 2021ء ) پاکستان مسلم لیگ ن نے جسٹس قاضی فائزعیسیٰ کے معاملے پر جوڈیشنل کمیشن بنانے کا مطالبہ کردیا ، نائب صدر ن لیگ مریم نواز نے کہا ہے کہ جسٹس قاضی فائز عیسیٰ کے خلاف سازش کی گئی ، مسلم لیگ ن اس معاملےکو نہیں جانے دے گی ، جسٹس قاضی فائزعیسیٰ پر جھوٹا ریفرنس بنانے پر جوڈیشل کمیشن بنایا جائے ، میں جسٹس قاضی فائز عیسیٰ اور جسٹس شوکت عزیز جیسے ججز کو سلام پیش کرتی ہوں ۔

تفصیلات کے مطابق اسلام آباد میں میڈیا سے گفتگو کرتے ہوئے انہوں نے کہا کہ عمران خان کے پورے دن کی کارکردگی یہ ہے کہ آفیسر ز کو بلا کر کہتے ہیں فلاں کو گرفتار کر لو اور فلاں کے خلاف مقدمہ کر دو ، اس سے بھی بڑی بات یہ ہے کہ جو قاضی فائز عیسیٰ کے ساتھ ہواہے ، جس طرح پرائم منسٹر ہاﺅس میں بیٹھ کر ایک جج کے اوپر جو کہ چیف جسٹس بنے گا انشاءاللہ آنے والے وقت میں ، آپ نے اس کے خلاف سازش کی ، آپ نے کہا کہ اس کو گرفتار کرو، یہ بہت سنگین معاملہ ہے ، ہم اس کو ایسے نہیں جانے دیں گے ، پاکستان کی تاریخ میں ایسا وقت کبھی نہیں آیا ، ن لیگ اس کو نہیں جانے دے گی ، عدلیہ سے یہ درخواست کر رہی ہوں کہ اس معاملے کو خود دیکھیں ، یہ کوئی معمولی بات نہیں ہے ، فائز عیسیٰ اور ان کی اہلیہ کٹہرے میں کھڑی تھیں ، آج میں فخر محسوس کرتی ہوں کہ انہوں نے کھڑے ہور کر مقابلہ کرتے ہوئے اسے بے نقاب کیا ہے۔

(جاری ہے)

مریم نواز نے کہا کہ لوگوں کو سمجھ آگئی ہے کہ سسلین مافیاز کیا ہوتے ہیں ، اداروں کے سربراہوں کو کہا جارہا ہے کہ رانا ثنا اللہ کے خلاف مقدمہ کرو ، سیاسی انجینئرنگ کے لیے ادارے استعمال کیےجارہے ہیں ، جسٹس شوکت عزیز کی گواہی آن ریکارڈ ہے ، جسٹس شوکت عزیز کی بات سنی جائے اور انہیں انصاف دیا جائے ، اب تو بشیر میمن کی گواہی آگئی ہے ، حکومت میں ہوتے ہوئے ان کیخلاف بڑی بڑی گواہیاں آرہی ہیں ، اتنی سیاسی انجینئرنگ کے باوجود نتیجہ کیا رہا ، ہرمحاذ پر حکمرانوں کو ناکامی ہوئی ، پاکستان میں عوام پر مہنگائی اور لاقانونیت کا عذاب آیا ہوا ہے ، ہر محاذ پر ان کو نااہلی اور ناکامی کا سامنا کرنا پڑا ہے۔