بھارتی ریاست کیرالہ میں ایک سال سے بیت الخلا میں مقیم خاتون کو مکان مل گیا

بہت خوش ہوں، میری تکلیفیں اب ختم ہورہیں،بیت الخلا سے مکان میں منتقل ہوجائوں گی،متاثرہ خاتون

جمعہ 18 جون 2021 14:04

نئی دہلی (اُردو پوائنٹ اخبارتازہ ترین - این این آئی۔ 18 جون2021ء) بھارتی ریاست کیرالہ میں ایک سال سے بیت الخلا میں مقیم خاتون کو مکان مل گیا۔بھارتی میڈیا کے مطابق بھارت کی جنوبی ریاست کیرالہ کے شہر پالاکڈ میں گزشتہ ایک برس سے خاتون بیت الخلا میں زندگی گزار رہی تھی، جس کی دنیا گھر تباہ ہونے اور بیٹی داماد کی موت کے بعد ویران ہوگئی تھی۔خاتون کی زندگی اس وقت بدل گئی جب وزیر بجلی کرشن کو خاتون کی تکالیف سے متعلق علم ہوا۔

جنتا دل پارٹی کے رہنما و وزیر بجلی نے اپنے جماعت کے افراد اور متعلقہ حکام کو خاتون کو محفوظ مکان میں منتقل کرنے کی ہدایت کی، جس کے بعد موروگا نامی خاتون کو پہلے اسپتال منتقل کیا گیا جہاں ان کا علاج کروایا جائے گا بعد ازاں انہیں ایک بہترین مکان میں شفٹ کریں گے۔

(جاری ہے)

وزیر کرشن نے کہا کہ میں نے خاتون کی تکلیفیں دیکھیں ہیں، پہلے ان کا مکمل علاج کروایا جائے گا اور گھر دیا جائے گا۔

میڈیا رپورٹس میں بتایا گیا ہے کہ خاتون کو گھر منہدم ہونے کے بعد بیت الخلا میں زندگی گزارتے ہوئے ایک سال کا عرصہ گزر گیا، اس دوران وہ واکر سے چلتی پھرتی اور اہل محلہ کے دئیے ہوئے کھانے پر زندگی گزار رہی تھیں۔مکان گرنے کے حادثے میں خاتون کی لے پالک بیٹی اور داماد ہلاک ہوگئے تھے جب کہ وہ خود ویل چیئر پر آگئی تھیں۔خاتون نے وزیر بجلی اور اہل محلہ کا شکریہ ادا کرتے ہوئے کہا کہ اب میں بہت خوش ہوں کیوں کہ میری تکلیفیں اب ختم ہورہی ہیں اور میں بیت الخلا سے مکان میں منتقل ہوجائوں گی۔