Live Updates

امارات واپس جانے کیلئے کوشاں محنت کش پاکستانیوں کیلئے مایوس کن خبر

ایمرٹس ائیرلائن نے پاکستان سے متحدہ عرب امارات کیلئے مسافر پروازوں پر عائد پابندی میں مزید توسیع کر دی

muhammad ali محمد علی بدھ 28 جولائی 2021 19:53

امارات واپس جانے کیلئے کوشاں محنت کش پاکستانیوں کیلئے مایوس کن خبر
دبئی (اُردو پوائنٹ اخبارتازہ ترین۔ 28 جولائی2021ء) امارات واپس جانے کیلئے کوشاں محنت کش پاکستانیوں کیلئے مایوس کن خبر، ایمرٹس ائیرلائن نے پاکستان سے متحدہ عرب امارات کیلئے مسافر پروازوں پر عائد پابندی میں مزید توسیع کر دی۔ تفصیلات کے مطابق متحدہ عرب امارات کی ایمرٹس ائیرلائن نے پاکستان سمیت بھارت، بنگلہ دیش اور سری لنکا میں پروازوں کی منسوخی میں 7 اگست تک توسیع کر دی ہے۔

عرب میڈیا کی رپورٹ کے مطابق ائیرلائن کی جانب سے جاری بیان میں کہا گیا ہے کہ پچھلے 14 دنوں میں پاکستان، بھارت، بنگلہ دیش یا سری لنکا کا سفر کرنے والے مسافروں کو کسی بھی دوسرے راستے سے یو اے ای میں داخلے کی اجازت نہیں دی جائے گی۔رپورٹ کے مطابق کورونا کی ڈیلٹا قسم سامنے آنے کے بعد یہ پاکستان اور بھارت سے پروازوں پر سفری پابندی کی تازہ ترین توسیع ہے۔

(جاری ہے)

متحدہ عرب امارات کے شہری، گولڈن ویزا کے حامل اور سفارتی مشن کے ممبران، جو کورونا کے پروٹوکول کی تعمیل کرتے ہیں وہ اس پابندی سے مستثنیٰ ہیں۔خیال رہے کہ اس سے قبل اتحاد ائیرلائن نے بھی پاکستان سمیت جنوبی ایشیا کے متعدد ممالک سے پروازوں پر پابندی میں توسیع کی تھی۔ اتحاد ائیر کی جانب سے بدھ کے روز دوبارہ ایک بیان جاری کر کے واضح کیا گیا کہ خاص کر بھارت سے امارات کیلئے اتحاد ائیرویز کی مسافر پروازوں پر غیر معینہ مدت کیلئے پابندی رہے گی۔

متحدہ عرب امارات نے کورونا کی ڈیلٹا قسم کے پھیلاو کی وجہ سے اپریل کے ماہ میں پاکستان اور بھارت سمیت کئی ممالک سے براہ راست پروازوں کی آمد پر پابندی عائد کی تھی، جس کی وجہ سے پاکستان چھٹی پر آئے محنت کش پاکستانیوں کی بڑی تعداد امارات واپس جانے سے قاصر ہیں۔ موجودہ صورتحال کی وجہ سے ان محنت کشوں کو خدشہ ہے کہ جلد واپس نہ جانے کی صورت میں کہیں ان سے ان کی نوکریاں نہ چھن جائیں۔
Live پاکستان میں کرونا وائرس کی چوتھی لہر سے متعلق تازہ ترین معلومات