وزیر داخلہ شیخ رشید احمد کی رہائش گاہ لال حویلی پر حملہ

راولپنڈی کے علاقے وارث خان میں نامعلوم افراد کی جانب سے اندھادھند فائرنگ، کم سن بچہ نشانہ بن گیا

محمد علی جمعہ 30 جولائی 2021 23:46

راولپنڈی (اُردو پوائنٹ اخبارتازہ ترین۔ 30 جولائی2021ء) وزیر داخلہ شیخ رشید احمد کی رہائش گاہ لال حویلی پر حملہ، راولپنڈی کے علاقے وارث خان میں نامعلوم افراد کی جانب سے اندھادھند فائرنگ، کم سن بچہ نشانہ بن گیا۔ تفصیلات کے مطابق راولپنڈی کے علاقے وارث خان میں واقع وفاقی وزیر داخلہ کی رہائش گاہ پر نامعلوم افراد کی جانب سے حملہ کیا گیا۔

میڈیا رپورٹس کے مطابق شیخ رشید احمد کی رہائش گاہ لال حویلی پر نامعلوم افراد کی جانب سے اندھا دھند فائرنگ کی گئی، تاہم فائرنگ کے وقت وزیر داخلہ لال حویلی میں موجود نہیں تھے۔ نامعلوم شرپسندوں کی اندھا دھند فائرنگ کی وجہ سے ایک 8 سالہ معصوم بچہ زخمی ہو گیا جسے ہنگامی طور پر ہسپتال منتقل کر دیا گیا، جبکہ علاقے میں پولیس کی مزید نفری طلب کر لی گئی۔

(جاری ہے)

وارثخان کےعلاقہ میں لال حویلی کےباہر گولی لگنےسے 08 سالہ بچہ زخمی، بچہ انس اپنے والد کے چنے کی ریڑھی پر بیٹھا تھا۔ بچے کو ہسپتال منتقل کر دیا گیا ہے جہاں اس کی حالت خطرے سےباہربتائی جاتی ہے۔ پولیس افسران موقعہ پر موجود، واقعہ کی تحقیقات جاری۔ قانونی کاروائی عمل میں لائی جارہی ہے۔
— Rawalpindi Police (@RwpPolice) July 30, 2021

واقعے کے حوالے سے راولپنڈی پولیس کی جانب سے بتایا گیا ہے کہ وارث خان کےعلاقہ میں لال حویلی کےباہر گولی لگنےسے 08 سالہ بچہ زخمی ہوا، بچہ انس اپنے والد کے چنے کی ریڑھی پر بیٹھا تھا، بچے کو ہسپتال منتقل کر دیا گیا ہے جہاں اس کی حالت خطرے سےباہربتائی جاتی ہے، پولیس افسران موقعہ پر موجود ہیں، واقعہ کی تحقیقات جاری ہیں،قانونی کارروائی عمل میں لائی جارہی ہے۔ جبکہ دوسری جانب یہ انکشاف ہوا ہے کہ کچھ روز قبل بھی لال حویلی پر اسی طرز کا حملہ کیا گیا تھا۔23 جولائی کو وزیر داخلہ کی رہائش گاہ لال حویلی پر چند نامعلوم افراد فائرنگ کر کے فرار ہوگئے تھے، حملہ آور تاحال گرفتار نہ کیے جا سکے۔