حکومت کا آئل ریفائنریز اور آئل مارکیٹنگ کمپنیوں کا آڈٹ کرنے کا اعلان

آڈٹ کا مقصد ٹیکسوں، مصنوعات کی خریداری اور نقل و حمل کے اخراجات میں بے قاعدگیوں کے امکان کو مسترد کیا جاسکے.رپورٹ

میاں محمد ندیم جمعرات 9 ستمبر 2021 09:25

حکومت کا آئل ریفائنریز اور آئل مارکیٹنگ کمپنیوں کا آڈٹ کرنے کا اعلان

اسلام آباد(اردوپوائنٹ اخبارتازہ ترین-ا نٹرنیشنل پریس ایجنسی۔09 ستمبر ۔2021 ) حکومت نے تمام آئل ریفائنریز اور آئل مارکیٹنگ کمپنیوں کا آڈٹ شروع کردیا ہے تاکہ ٹیکسوں، مصنوعات کی خریداری اور نقل و حمل کے اخراجات میں بے قاعدگیوں کے امکان کو مسترد کیا جاسکے. نجی ٹی وی نے پٹرولیم ڈویژن کے اعلی ذرائع کے حوالے سے بتایا ہے کہ 25 کمپنیوں اور ریفائنریز سے کہا ہے کہ وہ آڈٹ ٹیموں کے جائزے کے لیے متعلقہ ذاتی اور مکمل ریکارڈ کی دستیابی یقینی بنائیں سب سے پہلے ڈائریکٹر جنرل آڈٹ آف پیٹرولیم اینڈ نیچرل ریسورسز کی ایک آڈٹ ٹیم راولپنڈی میں اٹک ریفائنری لمیٹڈ اور ملتان میں پاک عرب ریفائنری کمپنی کا جبکہ آئندہ ہفتے شیخوپورہ میں تمام او ایم سیز، اور ڈپوز کا دورہ کرے گی.

(جاری ہے)

بعدازاں ملک بھی میں آئل مارکیٹنگ کمپنیوں کے دورے کیے جائیں گے پیٹرولیم ڈویژن نے تمام 25 کمپنیوں سے آڈٹ کے لیے سامان کے اعلان کے فارم، ٹریژری چالان، مقدار کے رجسٹرز اور دیگر متعلقہ ریکارڈ کی نقول دستیاب رکھنے اور آڈٹ ٹیموں کے ساتھ بھرپور تعاون کرنے کا کہا ہے جس میں پیٹرولیم ڈویژن کے نمائندے بھی شامل ہوں گے. باخبر ذرائع کا کہنا تھا کہ یہ کارروائی تیل کے بحران کے حوالے سے وفاقی تحقیقاتی ادارے کے ایک سینیئر افسر کی سربراہی میں ایک انکوائری کمیشن کی تفصیلی تحقیقات کے پیشِ نظر کی جارہی ہے.

کمیشن نے مختلف پہلووں بشمول پٹرولیم لیوی، اندرون ملک مال بردار مساوات مارجن، پروڈکٹ آرڈرز وغیرہ اور دیگر چیزوں کے علاوہ پاکستانی مارکیٹ میں اسمگل شدہ مصنوعات کے تفصیلی آڈٹ کی تجویز دی تھی کمیشن نے اسمگل شدہ پٹرولیم مصنوعات کی وجہ سے سالانہ تقریبا اڑھائی سو ارب روپے کے نقصان کا تخمینہ لگایا تھا.