پنجگور میں گھر پر فائرنگ سے رکنِ بلوچستان اسمبلی کا بھائی جاں بحق

یہ افسوسناک واقعہ اتوار کی شام رکن صوبائی اسمبلی کے رہائشی علاقے میں پیش آیا؛ پولیس حکام

ساجد علی اتوار 19 اکتوبر 2025 18:38

پنجگور میں گھر پر فائرنگ سے رکنِ بلوچستان اسمبلی کا بھائی جاں بحق

پنجگور (اُردو پوائنٹ اخبارتازہ ترین۔ 19 اکتوبر2025ء) پنجگور میں فائرنگ سے رکنِ بلوچستان اسمبلی کا بھائی جاں بحق ہوگیا۔ میڈیا رپورٹس کے مطابق صوبہ بلوچستان کے ضلع پنجگور کے علاقے چتکان میں نامعلوم مسلح افراد کی طرف سے کی گئی فائرنگ سے نیشنل پارٹی کے مرکزی رہنماء اور رکنِ بلوچستان اسمبلی میر رحمت صالح بلوچ کا بھائی جاں بحق ہو گیا۔

(جاری ہے)

پنجگور پولیس کا کہنا ہے کہ مقتول کی شناخت ولید صالح بلوچ کے نام سے ہوئی ہے جو نیشنل پارٹی کے رہنماء حاجی صالح محمد کے بیٹے اور ضلع پنجگور کے ڈسٹرکٹ چیئرمین مالک صالح بلوچ، رکن بلوچستان اسمبلی رحمت صالح کے چھوٹے بھائی تھے۔

پولیس نے بتایا کہ یہ افسوسناک واقعہ اتوار کی شام رکن صوبائی اسمبلی کے رہائشی علاقے میں پیش آیا جہاں نامعلوم افراد نے ولید صالح پر اُس وقت فائرنگ کی جب وہ اپنے گھر کے قریب موجود تھے، فائرنگ کے نتیجے میں وہ موقع پر ہی جاں بحق ہوگئے اور حملہ آور جائے وقوع سے فرار ہونے میں کامیاب ہو گئے، تاحال اس قتل کے محرکات فوری طور پر سامنے نہیں آئے، تاہم مختلف پہلوؤں سے تفتیش شروع کردی گئی۔