گزشتہ 6 سال سے پاکستان واپس آرہا ہوں ،پاکستان کو محفوظ ملک پایا: ڈیرن سیمی

نیوزی کے دورہ پاکستان منسوخ کرنے پر مایوسی ہوئی،سکیورٹی کا جواز بنا دورہ منسوخ کرنے پر افسوس ہوا،دورہ منسوخ ہونے سے پاکستان کرکٹ کو نقصان ہوگا: سابق ویسٹ انڈین کپتان

ذیشان مہتاب جمعہ 17 ستمبر 2021 17:08

گزشتہ 6 سال سے پاکستان واپس آرہا ہوں ،پاکستان کو محفوظ ملک پایا: ڈیرن ..

راولپنڈی (اردو پوائنٹ تازہ ترین اخبار ۔ 17 ستمبر 2021ء ) پاکستان کے دورے پر آئی نیوزی لینڈ کرکٹ ٹیم کے بورڈ نے اچانک سکیورٹی خدشات کا بہانہ بنا کر سیریز منسوخ کرنے اور وطن واپس جانے کا اعلان کردیا جس پر سابق ویسٹ انڈین کپتان ڈیرن سیمی نے مایوسی کا اظہار کیا ہے۔ اپنے ٹویٹ میں ڈیرن سیمی نے لکھا کہ ’’ پاکستان بمقابلہ نیوزی لینڈ سیریز سکیورٹی مسائل کی وجہ سے منسوخ ہونے کی خبر سن کر مایوسی ہوئی۔

پچھلے 6 سالوں سے پاکستان جاکر کھیلنا اور دورہ کرنا انتہائی خوشگوار تجربات میں سے ایک رہا ہے۔ میں نے پاکستان میں ہمیشہ محفوظ محسوس کیا ہے، یہ پاکستان کے لیے بہت بڑا دھچکا ہے‘‘۔

Disappointed waking up to the news of the cancellation of the Pakistan Vs New Zealand series because of security issues.Over the last 6 years playing and visiting Pakistan has been one of the most enjoyable experiences. I’ve always felt safe. this is a massive blow to Pakistan ☹️
— Daren Sammy (@darensammy88) September 17, 2021

یاد رہے کہ پاکستان اور نیوزی لینڈ کے درمیان 3 ایک روزہ میچوں کی سیریز کا پہلا میچ آج راولپنڈی سٹیڈیم میں دوپہر ڈھائی بجے شروع ہونا تھا اور پاکستان 18 سال بعد اپنی سرزمین پر نیوزی لینڈ ٹیم کی میزبانی کے لیے تیار تھا تاہم اچانک مہمان ٹیم کی کرکٹ بورڈ نے دورہ ختم کرکے ٹیم کو واپس بلانے کا اعلان کردیا۔

(جاری ہے)

اس حوالے سے پاکستان کرکٹ بورڈ نے بتایا کہ نیوزی لینڈ کی ٹیم اور آفیشلز کو فول پروف سکیورٹی فراہم کی گئی تھی جس پر انھوں نے اطمینان کا اظہار بھی کیا تھا تاہم اچانک نیوزی لینڈ کرکٹ بورڈ نے دورہ منسوخ کردیا۔ پی سی بی کے مطابق نیوزی لینڈ کرکٹ بورڈ نے صبح بتایا کہ انھیں سیکیورٹی خدشات کے حوالے سے الرٹ موصول ہوئے ہیں جس کے باعث دورہ پاکستان منسوخ کرنا ہوگا اور ٹیم کو واپس وطن بھیج دیا جائے۔ پاکستان کرکٹ بورڈ کی جانب سے جاری بیان میں کہا گیا ہے کہ ہم دورے کو شیڈول کے مطابق جاری رکھنا چاہتے ہیں اور تمام انتظامات بھی مکمل ہیں لیکن آخری لمحے میں نیوزی لینڈ کے فیصلے سے کرکٹ کے شائقین کو مایوسی ہوئی ہے۔