سعودی عرب میں مارچ 2020 کے بعد پہلی مرتبہ 50 سے کم یومیہ کورونا کیسز رپورٹ

ہفتے کے روز مملکت میں محض 39 افراد میں مہلک وبا کی تشخیص ہوئی، کورونا میں مبتلا مزید 6 افراد جان کی بازی ہار گئے

محمد علی اتوار 26 ستمبر 2021 01:04

ریاض (اُردو پوائنٹ تازہ ترین اخبار۔25 ستمبر 2021ء ) سعودی عرب میں مارچ 2020 کے بعد پہلی مرتبہ 50 سے کم یومیہ کورونا کیسز رپورٹ۔ تفصیلات کے مطابق سعودی عرب کی جانب سے کورونا کی وبا پر قابو پانے کے لیے تمام تر اقدامات کیے جا رہے ہیں۔ بڑے پیمانے پر ویکسی نیشن اور سخت پابندیوں کے انتہائی مثبت نتائج سامنے آر ہے ہیں۔ بتایا گیا ہے کہ سعودی عرب کرونا وائرس کیخلاف جنگ میں بہترین کارکردگی سے پوری دنیا کیلئے مثال بن گیا، مملکت میں مارچ 2020 کے بعد پہلی مرتبہ 50 سے کم کورونا کیسز رپورٹ، گزشتہ 24 گھنٹوں کے دوران مملکت میں صرف 39 کورونا کیسز رپورٹ ہوئے ہیں۔

سعودی عرب میں نئے کیسز سامنے آنے کے بعد مملکت میں کورونا کیسز کی مجموعی گنتی 5 لاکھ46 ہزار882 ہو چکی ہے۔ گزشتہ 24 گھنٹوں میں اس موذی مرض کی وجہ سے مزید 6 افراد دم توڑ گئے جس کے بعد مجموعی ہلاکتیں 8,694 تک جا پہنچی ہیں۔

(جاری ہے)

وزارت صحت کے مطابق گذشتہ 24 گھنٹے میں50کورونا مریض صحت یاب ہو کر گھروں کو لوٹ گئے۔مملکت میں اب تک کی صحت یابیاں 5,35,892 ریکارڈ ہوئی ہیں۔

دوسری جانب سعودی عرب میں 587 ویکسی نیشن سنٹرز کے ذریعے ویکسین کی 4 کروڑ 14 لاکھ سے زائد خوراکیں لگائی جاچکی ہیں۔ سعودی وزارت صحت نے تاکید کی ہے کہ جن مقامی اور تارکین افراد نے ابھی تک ویکسین نہیں لگوائی، وہ پہلی فرصت میں رجسٹریشن کروا کر ویکسین لگوائیں اور خود کو محفوظ بنا لیں۔ مملکت میں ویکسین لگانے کا عمل دسمبر 2020ء کے دوسرے ہفتے میں شروع کیا گیا تھا۔ اس وقت مملکت میں کئی ویکسینز لگائی جا رہی ہیں۔ مملکت میں مقیم تمام مقامی اور غیر ملکی افراد کو مفت ویکسین لگائی جا رہی ہے۔ سعودی حکام پرامید ہیں کہ جلد مملکت کی تمام آبادی کی ویکسی نیشن مکمل کر لی جائے گی۔