ٹی ٹونٹی ورلڈکپ: بنگلادیش نے عمان کو جیت کیلئے 154 رنز کا ہدف دیدیا

محمد نعیم کی نصف سنچری

ذیشان مہتاب منگل 19 اکتوبر 2021 21:20

ٹی ٹونٹی ورلڈکپ: بنگلادیش نے عمان کو جیت کیلئے 154 رنز کا ہدف دیدیا

مسقط (اردو پوائنٹ تازہ ترین اخبار ۔ 19 اکتوبر 2021ء ) ٹی ٹونٹی ورلڈکپ 2021 میں کوالیفائنگ راؤنڈ کے اہم میچ میں بنگلادیش نے عمان کو جیت کے لیے 154 رنز کا ہدف دے دیا۔ الامارات کرکٹ گراؤنڈ مسقط میں کھیلے گئے اس میچ میں بنگلادیش نے ٹاس جیت کر پہلے بیٹنگ کرنے کا فیصلہ کیا تھا۔ عمان نے اپنے سے کئی زیادہ تجربہ کار بنگلادیشی ٹیم کے ابتدائی 2 بلے باز لٹن داس اور مہدی حسن کو 21 کے مجموعے پر ہی آؤٹ کردیا تھا۔

تجربہ کار شکیب الحسن نے نوجوان بیٹسمین محمد نعیم کے ہمراہ 80 رنز کی شاندار شراکت بنا کر ٹیم کو پریشانی کے بھنور سے نکال دیا۔ اس مجموعے پر شکیب الحسن 42 رنز بنا کر آؤٹ ہوگئے، محمد نعیم نے اپنا روایتی کھیل جاری رکھا تاہم دوسرے اینڈ سے وکٹیں گرتی رہیں تو 64 رنز کی شاندار اننگز کھیلنے والے محمد نعیم بھی دباؤ میں آکر پویلین لوٹ گئے۔

(جاری ہے)

اننگز کے آخری لمحات میں محموداللہ کے 17 رنز کی بدولت بنگلادیش کی ٹیم 153 رنز بنا کر آل آؤٹ ہوگئی۔

عمان کی جانب سے بلال خان اور محمد نعیم نے عمدہ بولنگ کرتے ہوئے 3، 3 کھلاڑیوں کو آؤٹ کیا جبکہ کلیم اللہ نے دو اور ذیشان مقصود نے ایک وکٹ لی۔ واضح رہے کہ یہ میچ بنگلادیش کے لیے آر یا پار کی حیثیت رکھتا ہے، اس میں ناکامی کی صورت میں بنگلادیشی ٹیم ایونٹ سے باہر ہوجائے گی۔ گزشتہ میچ میں سکاٹ لینڈ نے بنگلا دیش کو اپ سیٹ کرتے ہوئے 6 رنز سے شکست دی تھی۔