اے این ایف کی حب میں کارروائی ،آئل ٹینکر سے بھاری مقدار میں چرس برآمد ، دو ملزمان گرفتار

جمعہ 22 اکتوبر 2021 13:03

اسلام آباد /کوئٹہ (اُردو پوائنٹ اخبارتازہ ترین - این این آئی۔ 22 اکتوبر2021ء) انسداد منشیات کے ادارے (اے این ایف) نے بلوچستان کے علاقے حب میں کارروائی کرتے ہوئے آر سی ڈی روڈ پر حب بائی پاس کے قریب دوران تلاشی آئل ٹینکر سے بھاری مقدار میں چرس برآمد کرلی۔

(جاری ہے)

ترجمان اے این ایف کے مطابق برآمد شدہ چرس کا وزن 631 کلوگرام ہے، چرس آئل ٹینکر کے مختلف حصوں میں بنائے گئے خفیہ خانوں میں چھپائی گئی تھی۔دوران کارروائی پشین کے رہائشی دو ملزمان کو موقع پر گرفتار کر لیا گیا۔ ملزمان منشیات کوئٹہ سے کراچی اسمگل کرنے کی کوشش کر رہے تھے۔ دونوں ملزمان کے خلاف انسداد منشیات ایکٹ کے تحت مقدمہ درج کر کے مزید تفتیش کا آغاز کر دیا گیا ہے۔