Live Updates

وفاقی وزارتوں کی سہ ماہی کارکردگی; وزارت انصاف و قانون نے بہترین کارکردگی دکھائی

وزارت قانون وانصاف نے 92 فیصدمقررہ اہداف مکمل کیے،

سمیرا فقیرحسین جمعرات 25 نومبر 2021 10:36

وفاقی وزارتوں کی سہ ماہی کارکردگی; وزارت انصاف و قانون نے بہترین کارکردگی ..

اسلام آباد (اُردو پوائنٹ تازہ ترین اخبار۔ 25 نومبر 2021ء) : وفاقی وزارتوں کی سہ ماہی کے مقررہ اہداف کی کارکردگی رپورٹ کے مطابق وزارتِ قانون و انصاف نے بہترین کارکردگی دکھائی۔ تفصیلات کے مطابق اہداف کی تکمیل کے معاملے میں وفاقی وزارت قانون و انصاف نے خاطر خواہ کارکردگی کی وجہ سے پہلا نمبر حاصل کرنے میں کامیابی حاصل کی۔ میڈیا رپورٹ میں بتایا گیا کہ وزارت قانون وانصاف نے 92 فیصدمقررہ اہداف مکمل کیے جبکہ باقی وزارتوں کے مقررہ اہداف کی تکمیل کی شرح 62 فیصد تک رہی۔

اس حوالے سے معاون خصوصی شہزاد ارباب نے وفاقی وزیرقانون و انصاف ڈاکٹرفروغ نسیم کو خط تحریر کیا جس میں بتایا گیا کہ وزیراعظم نے تمام وزارتوں کی سہ ماہی کارکردگی کا خود مشاہدہ کیا ہے۔ تمام وزارتوں کی اہداف کی اوسط تکمیل کی شرح 62 فیصدرہی جبکہ وزارت قانون کی مقررکردہ اہداف کی تکمیل کی شرح 92 فیصد سب سے زیادہ رہی۔

(جاری ہے)

وزیرقانون وانصاف بیرسٹرڈاکٹر فروغ نسیم اور ان کی ٹیم کوخط میں خراج تحسین جبکہ کارکردگی کے تسلسل کو جاری رکھنے پر زور دیا گیا ہے۔

خیال رہے کہ پاکستان کی حکومت آنے کے بعد سے ہی وزیراعظم عمران خان نے خود وزارتوں کی کارکردگی کا جائزہ لینے کا فیصلہ کیا تھا۔ اقتدار میں آنے کے چند ماہ کے بعد نومبر 2018ء میں تمام وزارتوں کی جانب سے کابینہ کے سامنے پیش کیے گئے اہداف کی روشنی میں سہ ماہی کارکردگی کا جائزہ لیا گیا تھا۔ سہ ماہی کارکردگی کا جائزہ لینے کے لیے وزیرِ اعظم آفس کی جانب سے طے شدہ فارمیٹ تمام وزارتوں کو ارسال کیا گیا تھا۔ اس ضمن میں وفاقی کابینہ نے ہر تین ماہ بعد وزارتوں کی کارکردگی کا باقاعدگی سے جائزہ لینے کا فیصلہ کیا تھا۔ یہ فیصلہ کابینہ کے ایک اجلاس میں لیا گیا تھا۔