مارشل لاء اور آمریت کو ہمیشہ صدارتی اور پارلیمانی لبادے میں چھپانے کی کوشش کی گئی‘ حافظ حسین احمد

پاکستان کی 74سالہ تاریخ میں نہ خالص صدارتی اور نہ پارلیمانی نظام آسکا بلکہ اسلام اور سوشلزم میں بھی ملاوٹ کی گئی

جمعرات 20 جنوری 2022 12:43

مارشل لاء اور آمریت کو ہمیشہ صدارتی اور پارلیمانی لبادے میں چھپانے ..

کبیروالا ، عبدالحکیم (اُردو پوائنٹ اخبارتازہ ترین - این این آئی۔ 20 جنوری2022ء) جمعیت علماء اسلام پاکستان کے سینئر رہنما اور ممتاز پارلیمنٹرین حافظ حسین احمد نے اپنے ایک بیان میں کہا کہ ماضی کے 74 سالوں میں پاکستان میں’’آدھا تیتر اور آدھا بٹیر‘‘کی طرز پر نہ تو خالص صدارتی طرز حکومت اور نہ مکمل پارلیمانی نظام آسکا- بلکہ اسلام اور سوشلزم میں بھی بھرپور ملاوٹ کی گئی حافظ حسین احمد نے کہا سکندر مرزا،سے لیکر جنرل ایوب خان، جنرل یحییٰ خان، جنرل ضیاء الحق اور جنرل پرویز مشرف تک نے اپنے غیر آئینی اقدام مارشل لائ اور آمریت کو صدارتی اور پارلیمانی لبادے میں چھپانے کی کوشش کی جبکہ سقوط مشرقی پاکستان کے بعد بظاہر آئینی طور پر یہاں پارلیمانی نظام کا فیصلہ کیا گیا مگر عملی طور پربرسراقتدار طبقہ نے نہ صرف پارلیمانی طریقہ کار بلکہ پارلیمنٹ کے وجود تک کو ہی یکسر نظر انداز کیا جس سے وفاق کی اکائیاں مزید غیر مطمئن رہنے لگیں - حافظ حسین احمد نے کہا کہ 74 سال گزرنے اور وطن عزیز کی اکثریت کی اقلیت سے علیحدگی کی کاری زخم کھانے کے بعد بھی ہم کسی ایک حتمی نظام پر مکمل عملدرآمد نہ کرسکے بلکہ اب بھی اس حوالے سے نت نئے تجربات کا سلسلہ جاری رکھا گیا ھے۔

(جاری ہے)

انہوں نے کہا کہ ہر آنے والے حکمران طبقہ اور پارٹی کو اپنے غیر آئینی اقتدار کی توسیع اور مضبوطی کے لیے بظاہر کوئی نہ کوئی آئینی پشتی بان کی ضرورت رھی ھی- اس کے لیے پارلیمنٹ سے ایل ایف او کی منظوری اور عدالت عظمیٰ(سپریم کورٹ) سی" نظریہ ضرورت" کا انوکھا اور اچھوتا فیصلہ کروا کر عالمی سطح پر پاکستان کے نظام انصاف کا ایسا ریکارڈ قائم کیا گیا جسے اور کوئی توڑ ہی نہیں سکتا