آسٹریلوی بیٹر گلین میکسویل بگ بیش میں سب سے بڑی انفرادی اننگز کھیلنے والے بیٹر بن گئے

جمعرات 20 جنوری 2022 13:49

سڈنی (اُردو پوائنٹ اخبارتازہ ترین - این این آئی۔ 20 جنوری2022ء) آسٹریلوی بیٹر گلین میکسویل بگ بیش میں سب سے بڑی انفرادی اننگز کھیلنے والے بیٹر بن گئے۔گلین میکسویل نے گزشتہ روز آسٹریلین ٹی ٹوئنٹی لیگ بگ بیش میں میلبرن اسٹارز کی نمائندگی کرتے ہوئے ہوبارٹ ہیریکنز کے خلاف ناقابل شکست 64 گیندوں پر ریکارڈ 154 رنز کی اننگز کھیلی،ان کی اس برق رفتار اننگز میں 22 چوکے اور 4 چھکے شامل تھے۔

(جاری ہے)

دائیں ہاتھ کے بلے باز کی یہ اننگز بگ بیش کی تاریخ کی سب سے بڑی انفرادی اننگز ہے، اس سے قبل آسٹریلیا کے ہی مارکس اسٹوئنس نے 147 رنز کی اننگز کھیلی تھی۔اس کے علاوہ اس میچ میں میلبرن اسٹارز نے ہوبارٹ ہیریکنز کے خلاف مقررہ 20 اوورز میں 2 وکٹوں کے نقصان پر 273 رنز بنائے جو کسی بھی فرنچائز لیگ میں کسی بھی ٹیم کا سب سے بڑا مجموعی اسکور ہے۔واضح رہے کہ میکسویل کی ریکارڈ اننگزاور ہوبارٹ کے خلاف 106 رنز سے فتح کے باوجود میلبرن اسٹارز کی ٹیم پلے آف کے لیے کوالیفائی نہ کرسکی۔