لاہور دھماکے بعد وزارت داخلہ کا صوبوں اور سیکیورٹی اداروں کو ہدایت نامہ جاری

دہشتگردی کے حالیہ واقعات کے پیش نظرسیکیورٹی کو فول پروف بنایا جائے۔ دہشتگردی کے خطرات سے نمٹنے کیلئے متعلقہ ادارے الرٹ رہیں۔ وفاقی وزارت داخلہ کا مراسلہ

ثنااللہ ناگرہ ہفتہ 22 جنوری 2022 13:05

لاہور دھماکے بعد وزارت داخلہ کا صوبوں اور سیکیورٹی اداروں کو ہدایت ..

اسلام آباد (اردوپوائنٹ اخبارتازہ ترین۔ 22 جنوری 2022ء) لاہور دھماکے بعد وزارت داخلہ نے صوبوں اور سیکیورٹی اداروں کو ہدایت نامہ جاری کردیا، دہشتگردی کے حالیہ واقعات کے پیش نظر دہشتگردی کے خطرات سے نمٹنے کیلئے متعلقہ ادارے الرٹ رہیں۔ ہم نیوز کے مطابق لاہور دھماکے بعد وزارت داخلہ نے صوبوں اور سیکیورٹی اداروں کو ہدایت نامہ جاری کر دیا ہے، جس کے تحت وزیر داخلہ شیخ رشید کی ہدایت پر وزارت داخلہ نے صوبوں کو سیکیورٹی بڑھانے کی ہدایت کر دی ہے۔

وزارت داخلہ کی جانب سے چیف سیکریٹریز ،پولیس ،رینجرز اور ایف سی کو مراسلہ ارسال کیا گیا ہے۔مراسلے میں ہدایت کی گئی ہے کہ دہشت گردی کے حالیہ واقعات کے پیش نظر سیکیورٹی کو فل پروف بنایا جائے۔ دہشتگردی کے خطرات سے نمٹنے کیلئے متعلقہ ادارے الرٹ رہیں۔

(جاری ہے)

دوسری جانب میڈیا رپورٹس میں بتایا گیا ہے کہ صوبائی دارالحکومت لاہور کے علاقہ انارکلی میں گزشتہ روز ہونے والے بم دھماکے کے واقعہ میں مزید پیش رفت سامنے آئی ہے، قانون نافذ کرنے والے اداروں نے سانحہ انارکلی کے دونوں سہولت کاروں کو حراست میں لے لیا ہے، جنہیں مزید تفتیش کے لئے نامعلوم مقام پر منتقل کر دیا گیا ہے، بتایا گیا ہے کہ سانحہ انارکلی کے دونوں سہولت کاروں کو جمعہ کی صبح راوی روڈ سے حراست میں لیا گیا، جن سے تفتیش جاری ہے۔

دونوں سہولت کاروں کی گرفتاری جائے وقوعہ کے گردونواح کے علاقوں میں نصب سی سی ٹی وی کیمروں کی بیک ٹریک کرنے پر عمل میں آئی ہے۔ سانحہ انارکلی کے حوالے سے میڈیا رپورٹس کے مطابق انارکلی بم دھماکے میں ملک دشمن قوتیں ملوث پائی گئی ہیں، جن کے واضح ثبوت حاصل کر لئے گئے ہیں، جس کی روشنی میں سی ٹی ڈی اور قانون نافذ کرنے والے اداروں نے سانحہ انارکلی کی تفتیش کا دائرہ کار وسیع کرتے ہوئے اسے پنجاب کے مختلف اضلاع تک پھیلا دیا ہے، واضح رہے کہ جمعہ کی صبح تفتیشی ٹیموں نے جائے وقوعہ پر نصب پنجاب سیف سٹی اتھارٹی کے کیمروں کے ساتھ ساتھ شہریوں کی جانب سے لگائے گئے نجی کیمروں کی فوٹیج کے ذریعے سانحہ انارکلی کے ملزمان کی تصاویر حاصل کر لیں، جن کی نشاندہی کا عمل کیے جانے کے بعد تینوں دہشت گردوں کی تصاویر نادرا کو بھجوا دی گئی تھیں، کلوزسرکٹ فوٹیجز سے تین مشتبہ افراد کی نشاندہی کرلی گئی تھی جس کے بعد تمام افراد کے چہروں کی شناخت کے لیے نادرا سے رابطہ کیا گیا ۔

پولیس ذرائع کے مطابق مشتبہ افراد دھماکے سے قبل جائے وقوعہ کے ارد گرد دیکھے گئے تاہم پولیس تفتیش مکمل ہونے تک کسی کو حتمی ملزم قرار نہیں دے سکتے ،مشتبہ افراد کا ریکارڈ حاصل کرکے کردار کا تعین ہوگا۔