ایک خاتون نے سب کے سامنے کہا اگر وزن کم کرو تو ’آفت‘ لگو گی، حبا بخاری

ہفتہ 22 جنوری 2022 23:34

لاہور (اُردو پوائنٹ اخبارتازہ ترین - آن لائن۔ 22 جنوری2022ء) حال ہی میں شادی کے بندھن میں بندھنے والی اداکارہ حبا بخاری نے کہا ہے کہ کچھ عرصہ قبل دوران سفر انہیں ایک خاتون نے پرواز میں سب کے سامنے دور سے کہا کہ اگر وہ اپنا وزن تھوڑا کم کرلیں تو وہ ’آفت‘ لگیں گی۔حبا بخاری حال ہی میں ’ٹو بی آنیسٹ‘ شو میں شریک ہوئیں، جہاں انہوں نے کیریئر سمیت شوبز انڈسٹری پر بھی بات کی جب کہ انہوں نے زندگی کے کچھ دلچسپ واقعات بھی بیان کئے۔

مذکورہ انٹرویو چند ماہ قبل حبا بخاری کی شادی سے قبل ریکارڈ کیا گیا تھا، جسے 19 جنوری کو ریلیز کیا گیا۔انٹرویو سے دو ہفتے قبل حبا بخاری رواں ماہ جنوری کے آغاز میں دیرینہ دوست ساتھی اداکار آرز احمد کے ساتھ شادی کے بندھن میں بندھیں تھیں۔

(جاری ہے)

شادی سے قبل ریکارڈ کرائے گئے انٹرویو میں حبا بخاری نے کہا کہ انہیں معروف ڈراما ساز حسینہ معین شوبز میں لے کر آئی تھیں، انہوں نے ہی ان کے والد سے اداکاری کی اجازت لی۔

پروگرام کے دوران حبا بخاری نے انکشاف کیا کہ انہیں فلموں میں کام کرنے کی پیش کش بھی ہو چکی ہے مگر اچھی کہانی اور کردار نہ ہونے کی وجہ سے انہوں نے کام سے معذرت کی۔انہوں نے کہاکہ اگر انہیں کسی اچھی فلم یا کہانی کی پیش کش ہوگی تو وہ ضرور قسمت آزمائیں گی۔ایک سوال کے جواب میں حبا بخاری نے کہا کہ اگر انہیں اپنے جسم کے کسی حصے کو بہتر بنانے کا موقع ملے تو وہ اپنا قد تھوڑا سا بڑھائیں گی۔

حبا بخاری نے ایک واقعہ بیان کرتے ہوئے بتایا کہ کچھ عرصہ قبل ہی وہ عفت عمر کے ہمراہ پرواز میں سفر کر رہی تھیں کہ دور بیٹھی ایک خاتون نے انہیں پہچانا اور دور سے ہی ان سے بڑی آواز میں باتیں کرنے لگی۔حبا بخاری نے کہا کہ مذکورہ خاتون نے دور سے بڑی آواز میں سب کے سامنے انہیں کہا کہ اگر وہ اپنا تھوڑا وزن کم کریں تو وہ ’آفت‘ لگیں گی۔اداکارہ کے مطابق خاتون کی جانب سے پرواز میں سب کے سامنے ایسا بولنے پر جہاں انہیں شرم آئی، وہیں انہیں خاتون کے بولنے کے انداز پر ہنسی بھی آئی۔