عابدہ پروین کا بھارتی گلوکاروں کے ساتھ صوفی کلام ’او میرے مولا‘ مقبول

ہفتہ 16 اپریل 2022 11:44

کراچی (اُردو پوائنٹ اخبارتازہ ترین - این این آئی۔ 16 اپریل2022ء) صوفی گائیکی کی ملکہ کہلائی جانے والی مقبول گلوکارہ عابدہ پروین کا بھارتی موسیقاروں سلیم سلیمان کے ساتھ گایا گانا ’او میرے مولا‘ یوٹیوب پر مقبول ہوگیا۔عابدہ پروین نے بھارتی موسیقار اور گلوکار بھائیوں کی جوڑی سلیم مرچنٹ اور سلیمان مرچنٹ کے ہمراہ صوفی انداز میں گانا گاکر نہ صرف پاکستانی بلکہ بھارتی مداحوں کے دل بھی جیتے اور صارفین نے ان کی تعریفیں کیں۔

’او میرے مولا‘ کو گزشتہ ہفتے 9 اپریل کو سلیم سلیمان کے یوٹیوب چینل پر ریلیز کیا گیا تھا، جسے اب تک ڈھائی لاکھ بار تک دیکھا جا چکا ہے۔گانے میں جہاں عابدہ پروین نے روایتی صوفیانہ گائیکی کا انداز اپنایا ہے، وہیں سلیم سلیمان نے بھی اپنے روایتی فوک انداز میں گلوکاری کرکے مداحوں کو رمضان المبارک اور ایک عید کا تحفہ دیا۔

(جاری ہے)

’او میرے مولا‘ کی خاص بات یہ ہے کہ اس میں بالی ووڈ اداکار پنکج ترپاتھی کو بھی دکھایا گیا ہے جو کہ دو بچوں کی پرورش کرنے والے تنہا والد ہوتے ہیں۔

ویڈیو میں پنکج تھرپاتھی کو بانسریاں فروخت کرکے گزر سفر کرنے والے شخص کے طور پر دکھایا گیا ہے جن کے دو کمسن بچے بھی بانسریاں فروخت کرکے ان کا ہاتھ بٹاتے دکھائی دیتے ہیں۔گانے میں دکھایا گیا ہے کہ بانسریاں فروخت کرکے اپنا گزر سفر کرنے والے کمسن بچے کمائے ہوئے پیسوں کو والد سے چراکر ان پیسوں سے بھوکے اور غریب افراد کو فروٹ کھلاتے ہیں۔گانے کی شاعری سمیت اس میں دیے گئے غریبوں کی مدد کے پیغام کو مداحوں نے سراہا اور لوگوں سے اپیل کی کہ وہ بھی رمضان المبارک میں ضرورت مند لوگوں کا خیال رکھیں۔گانے کی ویڈیو میں عابدہ پروین کو ویڈیو لنک کے ذریعے بھارتی موسیقاروں کے ساتھ گانا گاتے ہوئے دیکھا گیا ہے۔