محض ویوز، مقبولیت حاصل کرنے کیلئے کسی کی نجی زندگی ،خاندانی وقار کو نشانہ نہیں بنایا جانا چاہیے‘ توثیق حیدر

جمعہ 3 جولائی 2026 19:56

لاہور(اُردو پوائنٹ اخبارتازہ ترین - این این آئی۔ 03 جولائی2026ء) معروف اداکار توثیق حیدر نے مصنوعی ذہانت سے تیار کی گئی اپنی اور اداکارہ فرح سعدیہ کی جعلی شادی کی تصاویر و خبروں پر شدید تشویش کا اظہار کرتے ہوئے کہا ہے کہ محض ویوز اور سوشل میڈیا پر مقبولیت حاصل کرنے کے لیے کسی کی نجی زندگی اور خاندانی وقار کو نشانہ نہیں بنایا جانا چاہیے۔حال ہی میں سوشل میڈیا پر وائرل ہونے والی اے آئی سے تیار کردہ تصاویر میں دعوی کیا گیا تھا کہ توثیق حیدر اور اداکارہ فرح سعدیہ شادی کے بندھن میں بندھ گئے ہیں جس کے بعد یہ خبر تیزی سے مختلف پلیٹ فارمز پر پھیل گئی۔

توثیق حیدر نے گفتگو کرتے ہوئے کہا کہ منگل کی صبح آنکھ کھلتے ہی انہیں دوستوں اور جاننے والوں کی جانب سے بے شمار پیغامات موصول ہوئے۔

(جاری ہے)

بعض افراد انہیں شادی کی مبارکباد دے رہے تھے جبکہ کچھ اس بات پر حیران تھے کہ انہیں اس خوشخبری سے آگاہ کیوں نہیں کیا گیا۔اداکار کے مطابق ابتدا میں وہ خود بھی حیران رہ گئے۔ جب انہوں نے اپنی مبینہ شادی کی تصاویر دیکھیں تو پہلے انہیں یہ محض ایک مذاق محسوس ہوا تاہم چند لمحوں بعد اندازہ ہوا کہ مصنوعی ذہانت کی مدد سے ان کی جعلی تصاویر تیار کرکے انہیں حقیقی واقعہ بنا کر پیش کیا جا رہا ہے۔

انہوں نے بتایا کہ اس کے بعد انہوں نے فرح سعدیہ سے رابطہ کیا اور صورتحال سے آگاہ کیا۔ ابتدا ء میں دونوں نے اس پر ہنسی مذاق کیا لیکن کچھ ہی دیر بعد انہیں احساس ہوا کہ یہ معاملہ سنگین نوعیت اختیار کر رہا ہے جس پر دونوں نے فوری طور پر ایک وضاحتی ویڈیو ریکارڈ کرنے کا فیصلہ کیا۔انسٹاگرام پر جاری کی گئی ویڈیو میں توثیق حیدر اور فرح سعدیہ نے ابتدا ء میں مزاحیہ انداز میں ایک دوسرے کو شادی کی مبارکباد دی تاہم فوری واضح کر دیا کہ ان کی شادی کی خبریں اور تصاویر مکمل طور پر بے بنیاد اور اے آئی سے تیار کردہ ہیں۔ دونوں نے طنزیہ انداز میں کہا کہ جن یوٹیوبرز نے ان کی شادی کروا دی ہے اب وہ اپنی کمائی میں سے شادی کے تحائف بھی بھیج دیں۔