وزیر اعظم کی ہیلی کاپٹر حادثے میں شہیدمیجر طلحہ منان کے گھر آمد ، اہل خانہ سے اظہار تعزیت

شہداء ہماری قوم کا فخر ہیں، یہ راہ حق کے شہید ہیں، ان کی قربانیاں کبھی رائیگاں نہیں جائیں گی، وفاقی وزیر اطلاعات مریم اور نگزیب پاک فوج کا ہر افسر اور جوان مادر وطن کی خدمت سے ہمیشہ سرشار رہا ہے، شہید طلحہ منان کی ملک و قوم کے لئے قربانی کو ہمیشہ یاد رکھا جائے گا، بیان

اتوار 14 اگست 2022 15:25

وزیر اعظم کی ہیلی کاپٹر حادثے میں شہیدمیجر طلحہ منان کے گھر آمد ، اہل ..

اسلام آباد (اُردو پوائنٹ اخبارتازہ ترین - این این آئی۔ 14 اگست2022ء) وزیر اعظم شہبازشریف نے بلوچستان ہیلی کاپٹر حادثے میں شہید ہونے والے میجر طلحہ منان شہید کے اہل خانہ سے ملاقات کی جس میں میجر طلحہ شہید کیلئے فاتحہ خوانی اور تعزیت کا اظہار کیا گیا ۔اتوار کووزیرِ اعظم شہباز شریف بلوچستان ہیلی کاپٹر حادثے میں شہید ہونے والے میجر طلحہ منان شہید کے گھر پہنچے ۔

وزیرِ اعظم نے میجر طلحہ شہید کے لئے فاتحہ ادا کی اور انکے اہلِ خانہ سے ملاقات بھی کی۔وفاقی وزیر اطلاعات ونشریات مریم اور نگزیب بھی وزیراعظم کے ہمراہ تھیں ۔وفاقی وزیر اطلاعات نے میجر طلحہ منان شہید کیلئے فاتحہ کی۔ وفاقی وزیر اطلاعات ونشریات نے کہاکہ شہداء ہماری قوم کا فخر ہیں، یہ راہ حق کے شہید ہیں، ان کی قربانیاں کبھی رائیگاں نہیں جائیں گی۔

(جاری ہے)

وفاقی وزیرنے کہاکہ پوری قوم شہید طلحہ منان جیسے جوانوں کو جنم دینے والی مائوں اور عزم و استقامت کے پیکر والدین پر فخر کرتی ہے۔ انہوںنے کہاکہ پاک فوج کا ہر افسر اور جوان مادر وطن کی خدمت سے ہمیشہ سرشار رہا ہے، شہید طلحہ منان کی ملک و قوم کے لئے قربانی کو ہمیشہ یاد رکھا جائے گا۔وفاقی وزیر اطلاعات نے شہید طلحہ منان کی والدہ سے ہمدردی کا اظہار کیا اور شہید طلحہ منان کو ان کی عظیم قربانی پر عقیدت پیش کیا۔