دنیا کی بلند ترین عمارت برج خلیفہ کو پاکستانی پرچم کے رنگ میں رنگ دیاگیا

یو اے ای کی حکومت نے پاکستان سے یکجہتی کے اظہار کیلئے خصوصی انتظامات کرتے ہوئےدبئی کے برج خلیفہ کو مخصوص ایل ای ڈی لائٹس کی مدد سے پاکستانی پرچم کی شکل دے دی

Danish Ahmad Ansari دانش احمد انصاری اتوار 14 اگست 2022 23:26

دنیا کی بلند ترین عمارت برج خلیفہ کو پاکستانی پرچم کے رنگ میں رنگ دیاگیا
دبئی(اُردو پوائنٹ، اخبار تازہ ترین، 14اگست 2022) دنیا کی بلند ترین عمارت برج خلیفہ کو پاکستانی پرچم کے رنگ میں رنگ دیاگیا، خوبصورت منظر کو دیکھنے کیلئے ہزاروں پاکستانی برج خلیفہ کے اطراف جمع ہو گئے۔ تفصیلات کے مطابق پاکستان کے 75ویں جشن آزادی کے موقع پر متحدہ عرب امارات (یو اے ای) کی ریاست دبئی کے معروف اور بلند ترین ٹاور برج خلیفہ کو پاکستانی پرچم کے رنگ میں رنگ دیا گیا۔

متحدہ عرب امارات کی حکومت نے جشن آزادی کے موقع پر پاکستان سے یکجہتی کے اظہار کیلئے خصوصی انتظامات کرتے ہوئےدبئی کے برج خلیفہ کو مخصوص ایل ای ڈی لائٹس کی مدد سے پاکستانی پرچم کی شکل دے دی جس سے دیکھ کر لوگ خوش ہو گئے۔اس خوبصورت منظر سے لطف اندوز ہونے کے لیے ہزاروں پاکستانی برج خلیفہ کے اطراف جمع ہوگئے۔

(جاری ہے)

جہاں انہوں نے تصاویر اور سیلفیاں بھی بنوائیں۔

اس موقع پر پاکستانیوں نے وطن سے محبت کا بھرپور اظہار کیا۔دوسری جانب روسی صدر ولادی میر پیوٹن نے مبارکباد دیتے ہوئے کہا کہ پاکستان کےیوم آزادی پر صدر اور وزیراعظم کو مبارکباد پیش کرتے ہیں۔انہوں نے کہا کہ معاشی اور سماجی ترقی میں پاکستان کی کامیابیاں قابل ذکر ہیں۔دوسری جانب امریکا نے پاکستان کو 75 ویں یومِ آزادی پر مبارکباد پیش کی ہے۔

امریکی وزیرخارجہ اینٹنی بلنکن نے بیان میں کہا کہ پاکستان کے یوم آزادی کیساتھ باہمی تعلقات کے 75 سال مکمل ہو رہے ہیں۔انہوں نے کہا کہ دونوں ممالک کےدرمیان دوستانہ تعلقات کی طویل تاریخ ہے امید ہے دونوں ممالک کے درمیان تعلقات مزیدمضبوط ہوں گے۔سعودی عرب نے یوم آزادی پر پاکستان کو مبارک باد دی ہے۔ شاہ سلمان اور ولی عہد شہزادہ محمد بن سلمان نے صدر مملکت ڈاکٹر عارف علوی کے نام یوم آزادی کے موقع کی مناسبت سے تہنیتی پیغام بھیجا ہے۔

شاہ سلمان نے کہا کہ پاکستانی حکومت اور عوام کو جشن آزادی پر دل کی گہرائیوں سے مبارک باد پیش کرتے ہیں، اور ہم پاکستان کی ترقی و کامرانی، امن و استحکام کے لیے پرامید ہیں۔ولی عہد شہزادہ محمد بن سلمان نے بھی حکومت پاکستان اور عوام کے لیے نیک تمناؤں کا اظہار کیا۔واضح رہے کہ آج ملک بھر میں 75 واں یوم آزادی ملی جوش و جذبے سے منایا جا رہا ہے، وفاقی دارالحکومت اسلام آباد میں 31 اور صوبائی دارالحکومتوں میں 21,21 توپوں کی سلامی سے دن کا آغاز کیا گیا۔