راناثناء اللہ کے وارنٹ گرفتار ی کا معاملہ، اسلام آباد پولیس کا موقف سامنے آ گیا

اینٹی کرپشن اسٹیبلشمنٹ پنجاب نے ریکارڈ دینے سے انکار کیا، باقاعدہ آمد و روانگی کا اندراج کیا گیا، اسلام آباد پولیس تمام عدالتوں کے احکامات کی تعمیل کے لئے ہروقت حاضر ہے،اینٹی کرپشن اسٹیبلشمنٹ پنجاب کے افسران سے گزارش ہے قانونی معاملات کو قانونی طریقے سے حل کریں اورغلط بیانی سے گریزکریں،ترجمان اسلام آباد پولیس

مقدس فاروق اعوان پیر 10 اکتوبر 2022 13:51

راناثناء اللہ کے وارنٹ گرفتار ی کا معاملہ، اسلام آباد پولیس کا موقف ..

اسلام آباد(اُردو پوائنٹ،اخبارتازہ ترین ۔ 10 اکتوبر2022ء) اینٹی کرپشن پنجاب کی ٹیم وزیرداخلہ رانا ثنااللہ کی وارنٹ گرفتاری لے کر پولیس اسٹیشن پہنچی تھی۔اینٹی کرپشن حکام کا کہنا ہے کہ اسلام آباد پولیس نے وزیر داخلہ رانا ثنااللہ کے وارنٹ گرفتاری کی تعمیل سے انکار کر دیا۔ ہماری آمد روانگی بھی نہیں ڈالی گئی ،ہمارے ساتھ ناروا رویہ اختیار کیا گیا ،ہمارے ساتھ آنے والے اہلکاروں اور گاڑیوں کو بھی تھانے سے باہر نکال دیا گیا۔

اسلام آباد پولیس کا وزیر داخلہ رانا ثناء اللہ خان کے وارنٹ گرفتاری سے متعلق بیان سامنے آیا ہے۔ترجمان اسلام آباد پولیس کے مطابق تھانہ میں باقاعدہ وارنٹ گرفتاری وصول کئے گئے۔اینٹی کرپشن اسٹیبلشمنٹ پنجاب نے ریکارڈ دینے سے انکار کردیا۔

(جاری ہے)

تھانے میں باقاعدہ آمد و روانگی کا اندراج کیا گیا۔اینٹی کرپشن اسٹیبلشمنٹ پنجاب کو ہدایت کی گئی کہ وہ مروجہ طریقہ کار کے مطابق قانونی راستہ اختیار کریں۔

تاہم اینٹی کرپشن اسٹیبلشمنٹ پنجاب کی جانب سے کوئی واضح موقف نہیں اپنایا گیا۔ اسلام آباد کیپیٹل پولیس تمام عدالتوں کے احکامات کی تعمیل کے لئے ہروقت حاضر ہے۔ تمام قانونی ضوابط کے مطابق کارروائی عمل میں لائی جائے گی۔اینٹی کرپشن اسٹیبلشمنٹ پنجاب کے افسران سے گزارش ہے کہ قانونی معاملات کو قانونی طریقےسے حل کریں اورغلط بیانی سے گریز کریں۔

ایسے بیانات سے اداروں کے درمیان انتظامی امور میں باہمی تعاون کے رستے میں رکاوٹیں پیدا ہوتی ہیں۔ایسی غلط بیانی پر اسلام آباد پولیس قانونی کارروائی کا حق رکھتی ہے۔

وفاقی وزیر داخلہ رانا ثناء اللہ خان کے وارنٹ گرفتاری میں غلط بیانی کا معاملہ۔

تھانہ میں باقاعدہ وارنٹ گرفتاری وصول کئے گئے۔اینٹی کرپشن اسٹیبلشمنٹ پنجاب نے ریکارڈ دینے سے انکار کردیا۔ تھانے میں باقاعدہ آمد و روانگی کا اندراج کیا گیا۔اینٹی کرپشن اسٹیبلشمنٹ پنجاب کو ہدایت کی گئی ⬇️
— Islamabad Police (@ICT_Police) October 10, 2022

۔خیال رہے کہ آج اینٹی کرپشن عدالت میں وزیرداخلہ رانا ثناء اللہ سے متعلق کیس کی سماعت ہوئی تھی،اینٹی کرپشن حکام نے رانا ثناء اللہ کے خلاف توہین عدالت کارروائی کی استدعا کی جیسے عدالت نے مسترد کر دیا۔ عدالت نے اینٹی کرپشن ٹیم کو رانا ثناء اللہ کی گرفتاری کے لیے کوشش جاری رکھنے کی ہدایت کی۔ اینٹی کرپشن عدالت نے ایک بار پھر رانا ثناء اللہ کو گرفتار کرکے پیش کرنے کا حکم دیا تھا۔