عدالتوں کی عمارتوں سے نہیں اب انصاف سڑکوں پر ہی ملے گا، علیمہ خان

جسٹس باقر نجفی نے 50 روپے کے سٹامپ پیپر پر نواز شریف کو لندن بھجوایا اور آج وہی جج بڑی بے شرمی سے کہہ رہا ہے کہ عمران خان سرکاری ہسپتال سے علاج کروائیں؛ سابق وزیراعظم کی ہمشیرہ کی میڈیا سے گفتگو

ساجد علی بدھ 16 ستمبر 2026 15:53

عدالتوں کی عمارتوں سے نہیں اب انصاف سڑکوں پر ہی ملے گا، علیمہ خان

اسلام آباد (اُردو پوائنٹ اخبارتازہ ترین۔ 16 ستمبر 2026ء) پاکستان تحریک انصاف کے بانی چیئرمین عمران خان کی ہمشیرہ علیمہ خان نے عدالتی نظام پر شدید تنقید کی ہے اور قوم کو اپنے حقوق کے لیے سڑکوں پر نکلنے کی اپیل کردی۔ اسلام آباد میں میڈیا سے گفتگو کرتے ہوئے ان کا کہنا تھا کہ جسٹس باقر نجفی وہی جج ہیں جنہوں نے محض 50 روپے کے اسٹامپ پیپر پر نواز شریف کو بیرونِ ملک یعنی لندن جانے کی اجازت دی تھی اور آج وہی جج بے شرمی کا مظاہرہ کرتے ہوئے عمران خان کو یہ مشورہ دے رہے ہیں کہ وہ اپنا علاج کسی سرکاری ہسپتال سے کروائیں، اس دوہرے معیار سے ملک میں انصاف کی حقیقی صورتحال کھل کر عوام کے سامنے آچکی ہے۔

علیمہ خان نے عدلیہ کی موجودہ صورتحال پر بات کرتے ہوئے کہا کہ آج چیف جسٹس یحییٰ آفریدی جو کہ پورے ملک کی عدلیہ کے سربراہ تھے، انہوں نے آئینی عدالت کے سامنے اپنے ہتھیار ڈال دیئے ہیں، اس ملک میں اب آئین اور قانون کے مطابق انصاف ملنا بالکل ناممکن ہو چکا ہے اور یہ نظام عمران خان کو کبھی بھی انصاف فراہم نہیں کرے گا، عدالتوں کی ان عمارتوں سے اب قوم اور مظلوموں کو کوئی انصاف ملنے کی توقع نہیں رہی کیونکہ تمام ادارے اپنے اصل مقصد سے ہٹ چکے ہیں۔

(جاری ہے)

انہوں نے میڈیا نمائندوں سے بات چیت کرتے ہوئے عوام کو مخاطب کیا اور کہا کہ وہ اپنے بھائی عمران خان کی رہائی اور ملک کے آئین کے تحفظ کے لیے میدان میں نکل رہی ہیں، اگر قوم اور آنے والی نسلوں کو واقعی انصاف چاہیئے تو وہ اب سڑکوں پر نکل کر حاصل کرنا ہوگا کیونکہ ان سرکاری عمارتوں سے اب کوئی خیر نہیں ملے گی، قوم اپنے اور اپنے بچوں کے محفوظ اور باوقار مستقبل کی خاطر گھروں سے باہر نکلے اور اس ناانصافی کے خلاف اپنی آواز بلند کرے۔