Live Updates

تیل 108 ڈالر کے قریب، سعودی عرب کا عمان کے راستے اضافی خام تیل بھیجنے کا فیصلہ

آبنائے ہرمز میں کشیدگی کے باعث عالمی سپلائی متاثر، سعودی اقدام سے مارکیٹ میں قیمتیں معمولی نیچے آگئیں

میاں محمد ندیم بدھ 16 ستمبر 2026 16:21

تیل 108 ڈالر کے قریب، سعودی عرب کا عمان کے راستے اضافی خام تیل بھیجنے ..

نیویارک(اردوپوائنٹ اخبارتازہ ترین-انٹرنیشنل پریس ایجنسی۔16 ستمبر ۔2026 ) عالمی منڈی میں خام تیل کی قیمت 108 ڈالر فی بیرل کے قریب پہنچ گئی ہے، تاہم سعودی عرب کی جانب سے عمان کے راستے اضافی خام تیل کی ترسیل کی پیشکش کے بعد قیمتوں میں معمولی کمی ریکارڈ کی گئی ہے. امریکی خبررساں ادارے ایسوسی ایٹیڈ پریس کے مطابق برینٹ خام تیل کی قیمت 83 سینٹ کمی کے بعد 107.92 ڈالر فی بیرل ہوگئی، جبکہ امریکی ویسٹ ٹیکساس انٹرمیڈیٹ خام تیل 1.41 ڈالر کمی کے بعد 104.42 ڈالر فی بیرل پر آگیا.

(جاری ہے)

رپورٹ کے مطابق سعودی عرب نے آبنائے ہرمز میں جاری کشیدگی کے باعث عالمی مارکیٹ کو اضافی تیل فراہم کرنے کے لیے عمان کے قریب متبادل راستے سے خام تیل کی ترسیل کی پیشکش کی ہے عالمی توانائی مارکیٹ میں یہ پیش رفت ایسے وقت سامنے آئی ہے جب آبنائے ہرمز میں تجارتی جہازوں کی آمدورفت معمول سے نمایاں کم ہوگئی ہے، جس سے خام تیل اور دیگر توانائی مصنوعات کی عالمی سپلائی کے حوالے سے خدشات بڑھ گئے ہیں.

سعودی عرب کی جانب سے متبادل راستے کے ذریعے تیل کی فراہمی بڑھانے کے اقدام کو عالمی مارکیٹ میں سپلائی کے دباﺅ کو کم کرنے کی کوشش قرار دیا جا رہا ہے تاہم خطے میں جاری کشیدگی کے باعث تیل کی قیمتوں میں اتار چڑھاﺅبرقرار رہنے کا امکان ہے دوسری جانب امریکی تیل کے ذخائر میں اضافے نے بھی عالمی مارکیٹ میں قیمتوں پر کچھ دباﺅ کم کیا ہے. تاہم تجزیہ کاروں کے مطابق مشرق وسطیٰ میں صورتحال معمول پر آنے تک عالمی تیل مارکیٹ میں غیر یقینی صورتحال برقرار رہ سکتی ہے پاکستان کے لیے بھی عالمی تیل کی قیمتوں میں مسلسل اضافہ اہم ہے، کیونکہ بلند عالمی قیمتوں سے پٹرولیم مصنوعات کی درآمدی لاگت، زرمبادلہ کے اخراجات اور ملکی معیشت پر دباﺅبڑھ سکتا ہے.

ماہرین کے مطابق عالمی خام تیل کی قیمت میں اضافے کا پاکستان میں پٹرول کی قیمت پر اثر براہ راست ایک ہی تناسب سے نہیں پڑتا، بلکہ مقامی قیمتوں کا تعین عالمی مصنوعات کی قیمت، ڈالر کے مقابلے میں روپے کی قدر، ٹیکسز، پٹرولیم لیوی، فریٹ اور دیگر اخراجات کو مدنظر رکھ کر کیا جاتا ہے عالمی مارکیٹ کی نظریں اب آبنائے ہرمز میں بحری آمدورفت اور سعودی عرب کے متبادل سپلائی انتظامات پر مرکوز ہیں، کیونکہ ان عوامل کا آئندہ دنوں میں تیل کی قیمتوں پر براہ راست اثر پڑ سکتا ہے.