سکیورٹی فورسزکی کوہلو میں کارروائی کے دوران 9 دہشت گرد ہلاک، تین زخمی حالت میں گرفتار

ہفتہ 26 نومبر 2022 20:24

راولپنڈی(اُردو پوائنٹ اخبارتازہ ترین - این این آئی۔ 26 نومبر2022ء) سکیورٹی فورسز نے کوہلو میں بی ایل اے (ایچ) کے دہشت گردوں کے خلاف انٹیلی جنس کی بنیاد پر آپریشن کیا جس کے دوران فائرنگ میں 9 دہشت گرد ہلاک ،3 زخمی حالت میں گرفتار کر لیے گئے ہیں۔

(جاری ہے)

پاک فوج کے شعبہ تعلقات عامہ (آئی ایس پی آر) کے مطابق انٹیلی جنس ایجنسیاں 30 ستمبر کو کوہلو بازار میں دھماکہ کے بعد سے ان دہشت گردوں کی تلاش میں تھیں جس میں دو راہگیر شہید اور 19 زخمی ہوئے تھے، یہی تنظیم اور اس کے دہشت گرد علاقہ میں اغواء برائے تاوان، بھتہ خوری اور سکیورٹی فورسز پر حملوں میں ملوث تھے۔

آئی ایس پی ٓر کے مطابق دہشت گرد بلوچستان میں ترقیاتی منصوبوں پر کام کرنے والے انجینئرز اور مزدوروں کو بھی نشانہ بناتے تھے۔دہشت گرد اب کوہلو، کاہان اور میوند میں حملوں کی تیاری کر رہے تھے۔سیکیورٹی فورسز کا آپریشن ہفتہ کی صبح 6 بجے شروع ہوا، گھیرے میں آئے ہوئے دہشت گردوں اور سیکورٹی فورسز میں شدید فائرنگ کا تبادلہ ہوا، فائرنگ میں 9 دہشت گرد ہلاک جبکہ 3 زخمی حالت میں گرفتار کر لیے گئے، سیکورٹی فورسز کا علاقے میں سرچ آپریشن ابھی جاری ہے۔